Sudan-a drone-a mitthi vui beihnaah mi 40 thi

Sudan-a drone-a mitthi vui beihnaah mi 40 thi
Sudan-a North Kordofan state-a sipaiten an thunun al-Obeid khawpui daia mitthi vui inkhawm drone hmanga beihnaah mi 40 vel an thi tih thuneitute leh mihring dikna chanvo humhalhtuten an sawi.
Thawhtannia al-Luweib khuaa mitthi vuite puan ina pungkhawm beituah hian paramilitary Rapid Support Forces (RSF) puh an ni a, anni hian engmah an la sawi lo thung.
An khawpui, Khartoum leh khawthlang lam, Darfur inkalpawhnaa awm, el-Obeid-a damdawi in panpui an nih hmain mi tam tak an thi hman.
Tuialhthei tamna, Kordofan velah hian inbeihna a nasa a, kar hmasa chhung khan RSF-in hmar lam km 30 vela hla, Bara khua an lak hnuah el-Obeid hi mi 20,000 velin an tlanchhiatsan tawh.
Bara khua hi Darfur-a sipai inkulhna lian hnuhnung ber, el-Fasher an lak rualin an la a ni.
el-Fasher-ah RSF-te hian a ruala mi an thah, mipat hmeichhiatnaa mi tihduhdah, mi ruk bo leh mi rawk an ti nasa hle tih sawi a ni.
UN chuan RSF fighter-te hian Bara-ah pawh civil mi an that nasa niin an sawi bawk a. Hetianga mi suat hi indonaa dan bawhchhiatna leh mihringpuite chunga chet dan bawhchhiatna niin International Criminal Court (ICC) chuan a sawi.
RSF hruaitu chuan hetianga dan bawhchhiaa puhna hi chhui a inhuam a, a sipaiten el-Fasher-a mi an that nasa nia puhna chu a pha.
ICC-in thuchhuah an siamah chuan Thawhtanni khan thla 18 zet RSF-in an hual avang khan el-Fasher-a chengte hi an tam nasa hle niin an tar lang bawk.
UN-in a pawm, Integrated Food Security Phase network (IPC) pawhin South Kordofan state-a Kadugli khawpuiah pawh tam a nasa tih ans awi.
el-Obeid atanga chhim lam km 300 dawna awm hi RSF-in hualin mamawh lak luhna pawh an dang vek a ni.
UN chief António Guterres-a chuan Sudan-a tharum thawhna chu titawp tura ngein mihring manganna nasa tak thleng chu a nasa zel tih a sawi.
Sudanese sorkar chuan US-in inremna a awm theih nana rawtna a neihte an ngaihtuah dawn tih AFP an hrilh a. Washington leh ram dangte pawhin inkahhai puanga buaina chin felna kawng zawh turin an ngen hlawm.
Muanna a awm theih nan Saudi Arabia leh Bahrain-ah vawi eng emaw zat inbiak tawh ni mah se a hlawhchham zel a, lehlam lehlam hian inkahhai an pawm thei lo.
Inpea mi tanpuitu pawl, North Kordofan Resistance Committee chuan el-Obeid khawpui atanga khawchhak lam km 15 vela hlaa mitthi vui beihna hi Thawhtannia thleng niin an sawi.
North Kordofan-a humanitarian aid commissioner Mohamed Ismail-a chuan Sudan Tribune new website hnenah, “RSF helhovin mitthi vui lai chu drone-in an bei a, mi 40 an thi a, tam takin hliam an tuar,” a ti.
Sudan-ah hian April, 2023 atanga sipai leh RSF inkara tual chhung indona a chhuah hnuah mi 1,50,000 chuang thi tawhin mi maktaduai 12 chuangin an in leh lo an chhuahsan phah tawh.