Sudan atanga beih an nih leh chuan Chad-in chhan let tum

Sudan atanga beih an nih leh chuan Chad-in chhan let tum
Chad president chuan a sipaite chu Sudan atanga drone hmanga mitthi vuia pungkhawm beihnaa mi 17 thia mi dang eng emaw zat hliam tuar an awm hnuah beihna dang an tawk leh a nih chuan phuba laa che ve turin thu a pe.
Sipai uniform ha chungin President Idris Mahamat Déby-a chuan Nilaini zan khan emergency security meeting a kaihruai a, sipaite chu inring renga awm turin a hriattir a. Sudan nena an ramri chu ‘khar vek’ turin thupek a chhuah bawk.
Ramri khua, Tiné-a beihna thleng chu Chad ram humhalhna laka beihpui thlakna nasa tak leh langsar tak a nih thu a sawi.
Sudan-a an inbei mek pahnihte an vau hnu leh a hmaa ramri pawh khar a nih hnuah hetiang hi a thleng tih a sawi bawk.
Thla hmasa khan Chad hian Sudan ralthuam keng pawlten an beih fo tihtawp nan ‘hriattir thar a awm hma’ Sudan nena an ramri hi a khar a. Mihring inmamawhna thila ‘ngaihhnathiam tul bik thilah’ chauh inpawh a phalsak a, thuneitute hnen atanga phalna lak hmasak a ngai thung.
Tiné khuaa chengte chuan Nilainia pawikhawihna thlenga thite hi mitthi vui an nih thu an sawi a, Reuters news agency-in a tar lan dan chuan in pakhatah mitthi vuina inkhawma tel tur an pungkhawm a, Koran an chhiar.
He pawikhawihna hi hmun dang atang pawhin demna a tam hle a, National Assembly leh rorel lai party MP-te pawhin an dem.
Sorkar thupuangtu thuchhuah chuan, “Sorkar chuan thite a hre reng a, an chhungte sunte a tawrhpui tak zet a ni,” a ti.
Thupuangtu chuan tunah chuan Chad chuan dikna chanvo a neih angin ‘a invenna leh thawktute a tichak’ tih sawiin Sudan laka ‘khawvel dan zawm chunga che turin’ a inpeih tih a sawi.
Pawikhawihna hi Chad ramri, Darfur bial chhim lam bial tam zawk thununtu, paramilitary Rapid Support Forces (RSF) tih nia rin a ni a. A inrawlh loh thu an sawi a, Sudanese sipaite tihah an puh let a, sipaite hian RSF an puh ve bawk.
Sudan sorkar chuan Chad hi ralthuam leh tualthat tura mi rawih chi hmanga RSF thlawptuah a puh fo va, hei hi N’Djamena chuan a pha.
Sudan hi April, 2023-a an sipaite leh RSF-te thuneihna inchuhna avangin tual chhung indonain a tuam mek a. Mi nuai tam tak an thi tawh a, mi maktaduai 13 chuang an chenna in chhuahsanin an tlanchhia a, heng zinga maktaduai khat vel hian Chad an pan niin UN-in a tar lang.
Chad hian Sudan nen ramri km 1,400-a thui, fel lo leh thunun harsa tak a nei a. President-in a sipaite thu a pek hian nakinah he biala tharum thawhna hi a tihzual theih hlauhna a awm mek.