ZPM sawrkara chief minister tura hual sa Lalduhoma chuan sawrkar kalchhuak turin sum hnutchhiah a neih mumal dawn loh avangin sum harsatna sukiang tura hma lak leh corruption tihtawp chu an ngaihpawimawh hmasak ngai a ni tih a sawi.
Serchhip bial atanga thlantlin ZPM leader hian thuthar thehdarhtute zawhna chhangin, sawrkar kalchhuak tur atangin sum bawm ruak an chhawm dawn tih a sawi a. Chuti chungin, an lo intiam tawh angin kuthnathawktute thlai thar pali – sawhthing, aieng, hmarcha leh hmunphiah chu sawrkarin a leisak dawn tih a sawi.
Sum harsatna sukiang turin mithiam telna Resource Mobilization Team an din anga, sum inrenchem ngai, sum senna tul lo tihtawp ngai leh manpower lama daihzai zawka insiamrem ngaite an zirchiang anga, chumi rualin corruption tihtawp chu an hna hmasa ber pawl tur a ni bawk tih sawiin, chumi atan chuan CBI kohluh thlengin hma an la dawn tih a sawi.
Sawrkar thar lakluh a nih hnu ah ni 100 chhunga tihhlawhtlin tur an duanlawk tawh chu an puang anga, hma an la zui dawn tih a sawi a. Sawrkar thar an din thei tih hrilh turin naktuk emaw naktipah emaw larsap a hmu anga, party lama Val Upa Council rawn chungin sawrkar siam dan tur hi an duang dawn tih a sawi a ni.
Kum 2018 inthlanpui leh a hnu by-election ah Serchhip bialah thlantlin a ni tawh a, a tum thumna atana hnehna chantirtu Serchhip bial mipui chungah lawmthu a sawi tih Lalduhoma hian a sawi a. Opposition MLA anga nekbehna kara harsa taka an inenkawl kha, vawiinah chuan sawrkar chakna nen an inenkawl ve thei tawh dawn tih sawiin, “Kan hmalak dan tur chu, VC te, NGO hrang hrangte leh party-te nen kan la sawikhawm anga, chuta tul kan tih ang ang chuan hma kan la chho dawn a ni,” a ti. Inthlan zawh hnuah assessment an tih ngun thu leh an uluk thu sawiin, an beisei ang vela hnehna an chan thu a sawi a ni.
Sum harsatna sutkian leh corruption tihtawp kan tum – Lalduhoma
