Sum huiluh tam lama City khumtu Real
Infiamna huanga sum chevel zir chianga an hmuh dan tarchhuak thintu Deloitte an tih chuan season liamtaa football club liante sum lakluh dan chhuichianna thar ber Deloitte Money League an tarchhuahah Real Madrid chuan treble champion Manchester City hmakhalhin table chung sangber an luah.
2023 Champions League final an luhna kawngah khan City hian khelh hnih belhkhawma 5-1-a Real sawpin, sum siamchhuah tam kawngah erawh La Liga club an pha zui ta chuang lo a ni.
Deloitte hmuhchhuah danin Real Madrid hian 2022-23 season-ah khan an club din hnua an sum lakluh tam ber tum (record revenue/income) an tawngbua a, euro maktaduai 831 (£710m) hmangin Money League-ah City an lehpel a, dinhmun sangber an luah chho.
Euro maktaduai 826 (£705.6m) la hmuchhuak tling tho City chu pahnihnaah chhukin, FA Cup, Premier League leh Champions League Treble hlawhtlinna khan an sum hailuh a tisang hle a ni.
Khawvela club hraw zual 20 an zirchiante sum hailuh hi a hma chiah season ai khan 14% zeta tamin, euro vaibelchhe 10.5 (£8.97bn) a tling a, chu chu record thar a ni.
Club 20-te sum lakluh record chhungah hian sumdawnna atanga an sum hmuh (commercial revenue) belhkhawm vaibelchhe 4.4 leh inkhel en man atanga an sum ruh (matchday revenue) belhkhawm vaibelchhe 1.9 pawh record thar a ni bawk.
Kkum 2015-16 hnu lama a vawikhatna atan commercial revenue hian tunhma lama club-te sum lakluhna lianber ni fo thin TV lama inkhel tihchhuahna man atanga an sum hmuh (broadcast revenue) pawh a khum ta hial a, Covid-19 vanga buai kum 2019-20 season erawh kha chu chhiar tel chi a ni lo thung a; club 20 zinga 17-te chuan an commercial revenue-in kumtin pun lam a pan zel niin Deloitte hian a tarlang.
Season liamta khan broadcast income punna hi 5% (4.2bn euros) chauh niin, a chhan lianber chu 2022/23 season-ah khan anmahni tualchhung theuha broadcast kalphung hlawhchham vang a ni.
Khawvel football club hausa zual 20-te broadcast income chawhrual hi euro maktaduai 500 chuang a ni.
Sum hailut hnem ber Real Madrid hian Champions League semi-final pakhat zawkah City ngam loin, La Liga lamah pawh Barcelona hnuaiah pahnihna luah bawk mah se 2017-18 season hnu lama a vawikhatna atan Money League table-ah hma an hruai zui leh thei ta tho a, Copa del Rey, Uefa Super Cup leh Fifa Club World Cup-a an hlawhtlinna khan a chawikang ve bawk ang.
Top five luahtu dangte indawtthlak dan chu Paris Saint-Germain (euro 802m), Barcelona (euro 800m) leh Manchester United (euro 746m) an ni.
Euro maktaduai 683 (£583m) nen Liverpool chu hnungtawlh nasa ber niin, pathumna atangin pasarihnaah an chhuk a; Premier League lama pangana an luah pha chauh leh Champions League last-16 stage an paltlang zo lo kha an tuar a ni.
Tottenham, Chelsea leh Arsenal-te pawhin Premier League club atangin top 10 an la luah pha a, Newcastle (17th) leh West Ham (18th)-te pawh top 20 zingah an tel pha.
Hetih lai hian top flight club dang Leicester City, Leeds United leh Everton-te chu top 20 pawn lamah an tawlhchhuak thung a, a hma kum hnih chhunga a sang 20 zinga Premier League club 10 tal lang tling ziah thin kha tuntum hi chuan pariat chiah hmuh tur an awm ta a ni.
Top 20 zingah hian English club pahnih Hammers leh Reds bakah Atletico Madrid-te chu a hma kuma an sum lakluh pha lo awmchhun an ni.
Sum huiluh tam lama City khumtu Real
