Arunachal Pradesh Chief Minister Pema Khandu chuan voter-te chu ‘money culture’ hnawl turin a ngen a, inthlan lo awm leh tur chu sum ni lovin chet that dana teh turin a ti bawk a. BJP leader chuan politician inthlana sum seng vak chuan kum nga chhungin a sum sen neih let leh a tum ngei ngei tiin a sawi.
Election watchdog Association for Democratic Reforms (ADR) chuan Khandu chu India rama chief minister hausa ber pahnihna niin kum 44 mi chauh niin Rs 163 crore vel nei anga chhut a ni.
Lower Subansiri district-a Yachuli-a public meeting a neihnaah Khandu chuan Assembly inthlan leh chu ‘sum ni lovin chet that dana teh’ turin a ngen a ni.
“Eirukna kan sawisel reng a. Mahse khawi atanga intan nge kan chhut ngai em? Sum avanga voter-in a vote a thlak chiah khan a intan a ni” tiin chief minister chuan a sawi.
Arunachal Pradesh Assembly member 60 awmna inthlan chu nakuma Lok Sabha inthlan ruala neih a ni ang a, Khandu chuan inthlan campaign tan a duh tawh thu a sawi.
“Vanduaithlak takin, kan state-ah chuan a sum seng tam thei apiangin inthlanah chakna an chang mai a. Hei hi kan tihtawp a ngai. Sum hi a nia mi tha leh dik ten an constituency tihmasawn tura an theihna an hman dal thin chu ni” tiin chief minister chuan a sawi.
“Eng tiangin nge inthlana chakna an chan theih nana sum vaibelchhe tel seng ten an aiawhte an buaipui em em ang le? Kum nga hun a neih chu a sum sen lakleta hmuh let leh nan leh inthlan leh hisapin hun a hmang ang” tiin a sawi bawk.
ADR data ang chuan YS Jagan Mohan Reddy, YSR Congress Party chu chief minister hausa ber niin Rs 510 crore vel a nei a. Reddy hi Andhra Pradesh chief minister a ni mek.
Sum tawktarh hnawl turin Khandu an ngen
