India danpui kalh si loa sumdawnna kaihhnawiha ram leilungfa humhalh theihna dan chu Mizoram sawrkarin duan a tum a. Hemi ah hian a kaihhnawih pawl hrang hrang chu Thawhlehni khan Commerce director Dr H Lianzela kaihhruaiin inrawnkhawm a ni.
‘The Draft Mizoram Trade and Enterprises (Formalization and Facilitation) Bill 2026’ duan mekah sawiho hian Central YMA, Mizo Zirlai Pawl, Mizo Students’ Union, Mizoram Chamber of Commerce & Industry, All Mizoram Farmer Union, Aizawl City Local Council Association leh he bill-in a kaihhnawih tur department aiawh an tel.
Dan thar duan tum hi Mizorama sumdawnna felfai zawka kalpui dan tur leh bazar hrang hrang enkawl dan tur a ni a. Sumdawnna kawngah India danpui kalh si loa ram leilungfate humhalh an nih theihna tura fimkhur taka dan siam a nih theihnan inrawnkhawm hi koh a ni.
Tun hi a bul tanna niin, zau zawka inrawnkhawm leh tum a ni tih department hotute chuan an sawi a. Kalkhawmte ngaihdan leh rawtna hi ziakin June 30 ralhmain Commerce, Industries, Geology & Mining department-a thehlut tura ngen an ni. Chairman Dr H Lianzela chuan, dan thar duan turah hian theihtawp chhuah tlang tur leh a tha thei ang bera dan siam a nih theihnan kalkhawmte chu thawhpuiah a sawm a ni.
Sumdawnna lama dan thar duan tumah inrawnkhawm
