US leh China chu tha tharin inbiakna an tan leh ta a, khawvela economy lian ber pahnihte hi sumdawnna thila an indonaah inrem hun atana ni 90 chhung hun an inpek a tawp tep avangin ngaihven a hlawh hle.
Sweden-a inbiakna hi Washington chu Treasury Secretary Scott Bessent-a’n hovin Beijing hi Vice Premier He Lifeng-a hovin an thawk chhuak a. Inbiakna tan hma lawk hian US President Donald Trump-a chuan European Union (EU) nena sumdawnnaa inremna an neih thu a puan nghe nghe.
US leh China hian ni 90 chhung chhiah an inlaksak tihsan an tum kaltlangpui lo tura indawr nan hun an inpe a, hei hi August 12 hian a tawp dawn.
January thlaa White House-a Trump-a a kir leh hnuah US leh China hian an bungrua an inlak luhsaka chhiah an inlaksak chu 100% chuangin an intihsansiak.
Chhiah tihsan kalpu rih loh tura ni 90 hun inpe tur hian US leh China hotu liante chu kum tir lam khan Geneva leh London-ah inbiain hun an insiam a ni.
Kar hmasa khan Bessent-a chuan China nena an inbiakna hi ‘a tha zel’ tih sawiin inbiakna an kalpui leh turah chuan inrintawnna thar an siam ngei a beiseiawm tih a sawi.
Hong Kong-a South China Morning Post chuan Thawhtanni khan lehlam lehlam hian thla thum dang hun pawh sei leh an remti dawn niin a lo tar lang tawh.
Hetih lai hian Financial Times chuan US-in China-a technology thil thawn luh a khuahkhirh chuan inbiakna hi a tikhawlhkham thei dawn niin a tar lang ve thung a, Trump-a leh President Xi Jinping-a inbe zui tura thu an dah a rinawm niin a tar lang.
Ram pahnihte sumdawnnaa inepnaah hian technology thawn, a bikin artificial intelligence (AI)-a hman chi chip khuahkhirh chu a laimu ber a tling a ni.
US venhim hna thawktu hotute chuan US chip changkangte chu China-a sipai leh company-ten hmangin thil thar duan chhuah nan an hman palh an hlau a ni.
US-China inbiakna neih hma lawk hian Washington chuan kar hmasa khan EU leh Japan dawrin inremna an siampui.
Pathianni khan Trump-a leh European Commission President Ursula von der Leyen chuan sumdawnnaa inremna tur duan an pawm tih an sawi a. Thla eng emaw zat khawvela sumdawnna inkawp lian ber pahnih inkara neuh neuh awm chu a tawp ta a ni.
Kar hmasa vek khan Trump-a hian Washington chuan Tokuo nen sumdawnna inrem ‘lian tak’ an siam tih a puang bawk.
An inremnaah hian Japan chuan US-ah $ tluklehdingawn 550 an invest ang a, America-a an bungrua an hralhte chu chhiah 15% lak a ni dawn a, a hma khan Trump-a chuan 25% lakah a lo vau tawh a ni.
US hian tariff chungchangah UK, Indonesia leh Vietnam te chu inremna a siampui tawh bawk a. Britain lakah 10% lain US tariff rate hniam ber a ni dawn.
Tuna US-China inbiaknaah hian thil lian tak an sawi chhuah beiseina erawh a awm lo va; mahse, chhiah an inlaksak tawn sang tak kalpui an tum erawh an tihkhawtlai rin a ni.
Sumdawnna thilah US-China indawr thar leh mek
