Sumdawnnaa inremna siam tumin EU hotu-in India tlawh dawn

EU trade chief Maros Sefcovic-a chuan India nena free trade agreement siam tura tulte tia sawiho turin karleh hian New Delhi-ah a zin dawn niin Indian Trade Minister Piyush Goyal-a chuan Ningani khan a sawi.
US-in Indian bungrua a lak luha chhiah sang tak a lak hnuah Europe ramte nena zalen zawka insumdawn tawnna tura ruahmanna kalpui mek chu hmanhmawh zawka tihfel tuma hma lak a ni.
Indian thuneitute chuan EU nena indawrna hian hma lam thui tak a thleng tawh a, kar thara indawr chhunzawm lehna tura ruahman hi kumin kum tawpa inremna siam tumah a pawimawh ber lai a ni dawn niin an sawi a ni.
European Commissioner for Trade Sefcovic-a’n ni thum chhung India a tlawh tur hi Ningani atangin a ni danw tih Goyal-a chuan TV news channel India Today hnenah a sawi.
“European Union ram 27 awmna nen hian kum thum leh a chanve kal ta atang khan kan indawr tawh a, tunah hian rang takin hma lam a pan a ni,” a ti.
Tun hma lam pawhin India-EU free trade agreement atan hian indawr tawh thin a ni a, kum riat zet chhunzawm lohva dah a nih hnuah kum 2021 atang khan an inbe thar leh a ni.
EU hian lirthei, damdawi hmanrua, uaiin, spirit leh ni tin in chhung mamawh thilah chhiah tlem zawk lak an duh a, India hian an puanthan, damdawi, steel leh petroleum atanga siam chhuah thilah zalen zawka inzawrh theih an duh ve thung niin thuneitute chuan an sawi.
EU hi bungruaa India-in a sumdawnpui lian ber a ni sa mek a. India nena an inkara sumdawnnaa sum che hi 2023-24 chhung khan $ tluklehdingawn 137.5 tlingin a hma kum 10 kal ta aiin 90% chuangin a tam tawh zawk a ni.
Ningani vek khan Indian Prime Minister Narendra Modi chuan European Commission President Ursula von der Leyen chu phone-a inbiain EU chuan sumdawnnaa inremna hi kumin kum tawpa tihfel hman ngei a duh tih a lo hrilh a ni.
“Tihlawhtling turin hmalak tan a tul a ni,” tiin von der Leyen-i hian X-ah a tar lang zui.
Von der Leyen-i chuan India hi Ukraine-a indona titawp tur pawhin Russia nawrtu pawimawh tak a ni thei tih sawiin EU leh India hian kum 2026 tir lama inbiakna an neih tura thutlukna inang siam theih tumin hma a la mek tih a sawi bawk.