Super Bowl Halftime Show hi minute 13 vel awrh chauh a ni nain, khawvela rimawi lama stage ropui ber te zinga chhiar a ni a, kumin, Super Bowl LX Halftime Show, Levi’s Stadium, Santa Clara, California a an rama Pathianni zan, keini tana Thawhtanni tuka neih zawh takah Puerto Rican superstar Bad Bunny a perform a, Lady Gaga, Cardi B, Karol G, Jessica Alba, Pedro Pascal leh Ricky Martin ten an tawiawm.
Super Bowl hi NFL final niin, kuminah Seattle Seahawks leh New England Patriots ten final an khel a, Seattle Seahawks-in 9-0 a hma an hruai laiin halftime show a thleng ta. Bad Bunny hian ‘Titi Me Pregunto’ hla a bul tanin, off-white football jersey a hming tawp Ocasio tih inziahna leh number 64 inziak a rawn ha chhuak a, Puerto Rican culture pholanna turin show hi an buatsaih.
Halftime Show-ah hian a headline-tu ten zaithiam lar dang an pawt lut tel thin a, kuminah pawh Bad Bunny hian Karol G, Jessica Alba leh Cardi B te pawh a show-a inlan turin an sawm lut a, an hla hrang hrang a perform a, lamthiam rualin an tawiawm zel bawk. Mipui barakhaih turin Lady Gaga a rawn inlan thut a, ‘Die With a Smile’ salsa rhythm-in a rawn perform a, boruak a siam hle. Chutah Ricky Martin pawh rawn inlan ve lehin stadium chhung boruak a rawn chawk phul hneh hle.
A show tawp dawn lamah Bad Bunny chuan America ram hrang hrang hming lam chhuakin, mipuiin an lo support tha hle a, “Kan zavaiin hian America chu kan ni,” a ti.
Super Bowl Halftime Show-ah Bad Bunny a perform
