Super Cup hnehtu Bayern Munich
Bundesliga giants chuan German football season thar khuhhawnna German Super Cup-ah Pathianni zan khan 2-1-in Stuttgart an hneh hram.
Liverpool atanga inpuchhuak hlimhlawt Luis Diaz chuan a Bayern Munich debut minute 77-naah goal khat khungin, first half minute 18-na leka England captain Harry Kane-a goal hmahruai tihluh nen Bundesliga champion hi si hnih faia chak mai tura ngaih an ni hman a, mahse, hun pekbelh minute thum a kal mek laiin Jamie Leweling chuan German Cup winners Stuttgart siphurh pakhat zawk a sut then a; he consolation goal hian season thara Bayern trophy hmasaber tur a dang zo ta chuang lo a ni.
Liverpool-a season thum a khawsak chhunga game 148 khela goal 41 thun tling Colombia winger Diaz hian Germany-ah hnehin a career bul a tan a; tun nipui insuan hun lai hian Anfield club chuan Vincent Kompany team-ah pound maktaduai 65.5 lawihin an hralh a; a Bayern debut-ah Serge Gnabry cross atangin goal a khung nghal a, German-ho chuan tifuh an inti phawt ang le!
A club thar tana goal a thun hnu hian Diaz chuan a Liverpool team-mate hlui thi ta Diogo Jota a hre reng a ni tih leh a sun a ni tihlanna turin Portugal forward boral ta goal thun lawm dan chi khat hmangin goal a lawm.
Bayern hian season hawnna inkhel (season curtain-raiser)-ah chak ngun ber record siamin tum 11 an chak tling ta a; season liamta maia a career-a trophy hmasaber hlawhchhuak ve chauh Englishman Kane tan title a lak vawi hnihna a ni ve bawk.
German Super Cup-a Bayern an rawn hriam hraihna kawngah an keeper leh man-of-the-match ni zui ta Manuel Neuer a chetha a, Bundesliga season thar tan hma chawlhkar khat lek awm tawha rawn khel pangngai chho ve chauh kum 39 mi Neuer chuan pre-season match zawng zawnga an chak ang bawk khan Bundesliga season tharah pawh chak leh an duh dawn tih a sawi.
Bayern hian kum 11 chhunga a vawikhatna ni turin kum 2024 khan title an hlawhchhuak zo lo a, mahse, season liamta khan Manchester City captain hlui Kompany hnuaiah Bundesliga title an hawnkir leh ta a ni.
Bavarian-ho hian August ni 22,, tunkar Zirtawpni zan hian an league title kawl laia an chetchhuah vawi khatna turah RB Leipzig an hmachhawn ang.
Super Cup hnehtu Bayern Munich
