Sawrkarin kum khat chhunga sum hman tur budget estimate a pharh a, chu chu House-in a pawm hnuah pawisa chu hman a ni ta a. Kum khat a han ral meuh chuan, estimate aia tam daih sum hman a lo ngai ta thin a. Chutianga budget estimate aia tam hman ral zat chu kumthar budget estimate pharh hunah House pawm turin pharh tel ve a ni ta thin a, chu chu Supplementary Demand tih a ni.
Kum 7 kal ta chhunga Supplementary Demand dinhmun han chhui let ta ila:
Kum 2019-20 chhunga Supplementary Demand kha cheng vaibelchhe 3398.13 a ni a. A kum leh 2020-21 chhung khan cheng vaibelchhe 2320.79 niin, a hma aia a tlemna hi cheng vaibelchhe 1077 vel a ni. Kum 2021-22 chhungin cheng vaibelchhe 2161.47 a ni a; a hma aia a hniamna hi cheng vaibelchhe 159.32 a ni.
Kum 2022-23 chhung hian Supplementary Demand chu cheng vaibelchhe 3141.36 a ni ta dawrh a; cheng vaibelchhe 979.89 zetin a lo pung chho ta a ni.
Kum 2023-24 khan Supplementary Demand chu cheng vaibelchhe 3287.93 a lo ni leh ta a; a pung chho leh hret a, a punna hi cheng vaibelchhe 146.57 a ni.
Kum 2024-25 khan SD chu cheng vaibelchhe 3512.33 a ni a, pung zel; a punna hi cheng Vbch 224.4 a ni. A kum leh 2025-26 chhungin SD hi a pung leh hret a, cheng Vbch 3710.38 a ni a, a punna hi cheng Vbch 198.05 a ni bawk.
Supplementary Demand kan hmuh hnuhnun ber cheng vbch 3710.38 hi a tam ta hle. Hemi chungchangah hian finance lam mithiam Dr James LT Thanga, MZU chuan supplementary demand chu sâng a tih thu sawiin, vbch 1000-1500 vel hi normal-ah a ngaih theih ang a, vbch 3000 chuang chu keini state ang tan chuan a sâng tiin a sawi a. Chuti a nih chuan, tuna kan han tarlan theih kum 7 vel chhunga SD dinhmun han thlir hi chuan, normal kan thleng ngai lo tihna a ni.
Supplementary Demand hi sum hmanral tawh a nih miau avangin House-in tih theih a nei tawh lo a, a nihna anga pawm liam mai a ngai thin. Chuti a nih chuan, Supplementary Demand-ah hian, mipui chhawr tangkai phak chiah loh thil vawm luh hi a harsa viau lo thei mai ang em? tih hi zawhna awm thei a ni ta!
Supplementary Demand Chronology
