Aam Aadmi Party tan hnehna niin Supreme Court chuan Zirtawpni khan Delhi Chief Minister leh party supremo Arvind Kejriwal chu bail phalsakin Delhi excise policy case kaihhnawiha Delhi High Court in August 5 a order a siam chu a hnawlsak rih bawk.
Bench of Justices Surya Kant leh Uijjal Bhuyan te chuan Kejriwal chu Rs 10 lakh bond leh sureties pahnih pe a bail a phalsak a. Top court chuan Kejriwal chu a case chungchang engmah mipui hnena sawi lo turin a ti bawk.
Delhi Chief Minister Kejriwal CBI tena June 26 a an man chungchangah Supreme Court ah pawh bail tur a nih leh nih lohah ngaihdan a inang lo bawk a.
CM Kejriwal chu hun rei tak chhung khung hranin a awm tawh tia sawi Bench chuan, “August 17, 2022 a FIR thehluh a nih atangin chargesheet pali siam a ni tawh a. Chargesheet hnuhnung ber chu Augsut 29, 2024 khan thehluh a ni a. Document te a tam hle a, engti kawng pawhin trial neih fel mai theih a ni dawn lo” a ti a.
CM Kejriwal man a nihnaah CBI te chuan Section 41A(3) of CrPC an bawhchhe lo tibawkin Justice Kant chuan Kejriwal chu judicial custody a awmsa a nih avangin man a nihna kawngah harsatna a awm lo a ti bawk.
Justice Ujjal Bhuyan chu Justice Kant thlirna chu kalh thungin, “CBI te chuan CBI nih anga man a tulna leh mamawhna an hre lo. ED case a Kejriwal chu bail a chhuah remtih a nih hnuah chauh CBI te chu an inrawlh a, CBI ten an manna kaihhnawihah rinhlelhna a awm a ni” a ti ve thung.
Justice Bhuyan chuan CBI te chu ‘premier probe agency an ni’ tia sawi bawkin uchuak taka che tur an ni lo a ti bawk a. “Demcoracy ram ang bikah te phei chuan mi manna chu high-handed manner a kalpui tur a ni lo. CBI te hian ‘caged parrot’ anga ngaih an nihna ata talchhuah turin chet an la zawk tur a ni a. An landan pawh ‘uncaged parrot’ anga lang zawk tur an ni” tiin a sawi.
Justice Bhuyan chuan Kejriwal chu ED case ah bail a nih tawh laia judicial custody a la daha hren reng chu a dik thei lo a ti bawk a. ED case a bail pek tawh CBI case avanga la hren reng chu a dik thei mawlh lo tiin a sawi bawk.
Justice Bhuyan chuan ‘bail chu rule a ni a, jail chu exception’ tia sawi bawkin, “Trial kalpui emaw man emaw chu harassment ah a chhuak tur a ni lo” tiin a sawi bawk.
Kejriwal chuan Delhi High Court ah bail dilna thehlutin chumi hnuah apex court ah a kal leh a. August 5 khan Delhi High Court chuan Chief Minister Kejriwal manna chu ‘legal’ a tihsak thung a. Kejriwal an amah manna a khinletna chu hnawlsakin CBI te chaun amah an a nih theihna turin finfiahna an nei ngah tawk a tihsak bawk.
High Court chuan CBI tena Kejriwal an mannaah thil fello leh dik lo a awm lo ti bawkin Kejriwal man a nihna chuan amah laka finfiahna neia sawi turte huaisenna a pe zawk a ni a ti bawk a. Kejriwal chu khua leh tui satliah a ni lo va, Magsaysay Award pawh dawng tawh tu leh Aam Aadmi Party convenor pawh ni a ni tlat a ti bawk.
March 21, 2024 khan ED te chuan nuaibo tawh Delhi excise policy 2021-222 a thil fello leh sum chheprelhna nasa tak awm tiin Kejriwal chu an man a. June 26, 2024 khan CBI te chuan Enforcement Directorate custody a a awm mek laiin excise case kaihhnawihah tho Kejriwal chu an man leh zui a ni.
Supreme Court in Kejriwal bail in chhuah ta
