RK Dawla
Mb 9366095658
1. June 2026 chu chawlhkar khat a liam leh ta. Ruahtui a chawl hlek a. Nikir khaw chêng kan hmu thuai turah ngai ila. Leilung leh boruak a lumin a hnawng tha bawk a, hnim chi tiah leh than duh hun, thlaite than duh hun a inher chho mêk a. Chawrno insiam that hunlai nangching turin, eichhetu rannung pawh an puang tawh viau bawk. Ram lamah pawh thosi leh tlip an puang tan a, hnathawh ti nuam lo tham an ni fo thin. Inchei nikhuaa inkah rimtui nâna kan hman thin perfume spray-te hi, hnathawh nikhuaa thosi/vaihmite seh tam lutuk tur laka invên nân an tihchi ve phian a. Thosiin min seh hian, an thiante hnenah an mamawh thisen dawt tur a awm tih hrilh nân, pheromone an tichhuak a, chu chu kan taksaah kan kai ta a. Tichuan, a dangho pawh rawn kalin min vir hut hut thin. Chubâkah, kan thlan rim hian a ko bawk. Zan lama zu inho pawh an thlan atanga zu rim chhuak vangin, khawivahin an bawm duh êm hi. Tichuan, heng thosite pheromone leh kan thlan tla rim luahlan turin perfume hi hnathawh thawmhnaw-ah kâp zeuh ila, thosi seh kan tawrh nêp phah viau thin. Company tam takin thosi repellant cream/lotion an siamchhuak bawk a. Hengte hi kuthnathawkmi tân chuan hman a lukhawng hle bawk e.
2. Kan ram zîm tê-ah hian, thlai chin tur thlan kawngah ngaihtuahna kan hman a tul hle a. Thlasik Dawnfawh kan intihhmuh a, a ching thang chuan kan thiam tawh viau a, midang kan intihhmuh viau zel bawk. Dawnfawh hi kan thawnchhuak lutuk lova, Mizoram chhunga hralh kha kan êm ber a. Ramdang atangin a lo lût reng bawk nen, tun dinhmunah chuan Thlasik dawnfawh thar lai hi chuan, a chingtu lam hi a hralhna kawngah kan buai tan dêr! Tin, Dawnfawh hi a man a tam hma a, mi naranin a pum pumin kan lei phâk lo deuh a, khawimaw laiah a zai lêp-sa kan lei zeuh zeuh a nih loh chuan. Chuvang chuan, dawnfawh chhungkaw zinga mi tho, Fanghmate hi kan uar thiam a tul ta viauin a lang. Company siam fanghma chi chauh ni lovin, kan local fanghmate pawh hi off-season-ah a lo chin theih êm êm tih kan hmuchhuak a. Chuvangin, mi uar ang uar ve ngawt lo deuh, kan leilung mil, kan hun neih dan mil leh kan market mil thlai chin tur thlan kan thiam a ngai hle.
3. Mizoram chhunga hralhna buai ngai mang lo, kan heh êm êm sî chu paan/kuhva hi a ni. Kuhva hi chu khawthlang lamah an uarin an hlawkpui viau a. Tin, tharchhuak turin thangkhat lian dawn nghah a ngai ve bawk a. Ni tin eichawp dap tân hma lâk tak tak a har deuh. Paan ve thung erawh hi chu, kan intodelh lo nasa hle. Kum khat (thla 12) chhung leka puitling hman, huana thing awmsate kit rêm kher lo, thawlh thawl ringawta chin mai theih kha a ni a. Kan la uar lo êm êm. Tin, market thuhlaah pawh, thenawm state atanga panhnah rawn zuarte luahlan hi a har lo. Anni aia tharlam zawk, tlawm zawk hleka kan pêk theih chuan, min compete reng thei lo chiangsa. Hmunhma buatsaih lutuk ngai lo, thing tamna ram nei tân chuan, panhnah chin mai hi Mizoram khawi laiah pawh, 1200m aia hniamah chuan a tihchi vek mai. A zâm sâng lutuk tur veng tur te, hniam taka hnah hlai tak tak tharchhuak tur khan kan biakrawn theih bawk a. Tin, a chi tha kan kawl deuh reng bawk. Sumdawng hnên atanga thlai tiak lei hian, a enkawl zuina lamah min pui zui thei tawh lova, a man an chhiar to viau thin bawk. Tin, a chi tha leh tha lo kha an hre ve tak tak lo bawk, a suak a tam duh êm êm. An thiam loh ni lovin, anmahni rawn supply-tu lam thiam loh zawk. Hman deuha Dept kaltlanga kan Limbu/Nimbu tiak dawn kan phun pawh Serfang deuh vek! Paan chi tha, Mizorama kan enkawl chhel tawh, tui bîk leh hrisel tha atanga farmer-ten a chi kan siam hi chu sumdawngho hian an hmu pha dawn lo hrim hrim. A duh tur tân kan biak theih e. Chu mai bâkah, a enkawl zuina leitha leh natna buaipui kawngah, kan pui zui thei bawk. Eng pawh ni se, thlai tiak kan lei dawn a nih chuan, a theih chin chinah direct-in, kan farmer-puite hnên atangin lei hrâm hrâm ila, a manhla ber e.