Suzuka tlankawnga chesual duh lo Verstappen

Suzuka tlankawnga chesual duh lo Verstappen
Japanese Grand Prix an tlanna Suzuka Circuit-a intlansiak hnuhnung vawithumah Red Bull driver Max Verstappen a chak fai vek a, kumin championship-ah erawh bul a tan fuh lo a, intlansiak hmasa pahniha hnehna a chan zawh loh avangin Pathianni Suzuka tlankawngah pawh a chak zo tawh lo mai ang a tih rinna a piang hman a, mahse, a zawna a kum lina atan Japanese GP-ah pakhatna a ni leh ta a, kumina grand prix hnehna a chan vawikhatna a ni nghal bawk.
World champion ni nawn awn awn mek Dutch driver hnungah hian kumina vawikhat ve ve chak ve tawh McLaren driver pahnih Lando Norris pathumna Oscar Piastri an indawt thla.
Ti hian, kum li chhung chu a zawn zatin Verstappen hian Japanese Grand Prix bikah pole position luah chungin hnehna a chang fai vek a, season tir lam intlansiak hmasa pahnih thununtu McLaren a rawn hmakhalh leh ta phawt a, leirem a rap chhunzawm zel dawn em kan thlir ang!
Red Bull driver Verstappen tan tun kha a career-a Grand Prix hnehna tum 64 a chan tlinna chiah niin, a hnung chiaha rawn tlan thleng phe vuai McLaren championship leader Lando Norris lakah second 1.4-in a chungnung a, Suzuka tlankawng sira mipui 115,000 chuangin zahna an hlan.
Japanese Grand Prix-a vawili chak zawn thei driver hmasaber ni zui ta Verstappen hi a hun tawnin a tihlim ve hle a, chu mi chungchang chu sawiin, “Awihawm loh khawpin ka hlim. He chawlhkar bul kan tan dan kha a hautak angreng a, mahse, kan beidawng duh lo a, kan car pawhin hma a sawn zel a, vawiin hian kan car dinhmun that ber hun kan nghakchhuak leh ta a ni,” a ti.
Drivers’ standing lama Briton Norris-a hmahruaina a themlem ta hle a, Verstappen lakah point khat chauhin a sang tawh.
Inrinniah qualifying an tlan a, Pathianni intlansiakah chetsualna leh rokhawlhna langsar tham thleng a awm lo.
Lap 53-ah car tlan zawng zawng 20-in line an pel fai vek a; ruahin a tibuai lo a, practice tibuai tura tlankawng sir phul kang khu vung vung hmuh tur a awm lo a, yellow flag vawikhat pawh vai a ni lo!
Melbourne khaw season-opening race hnehtu Norris chuan a um phak lo fakin, “Max khan a khalh tha takzet a, tihsual pawh a nei duh lo,” a ti.
Intlansiak hnuhnungber China rama pakhatna Australian Piastri pawhin McLaren chu point san dan indawta a pathumna a ruhpui leh ta tho a, a kum 24-na piancham lawm chungin lawmman semna dawhsan hniam ber a luah.
Ferrari khalhtu Charles Leclerc chu palinaah thlengin, Mercedes driver pahnih George Russell leh Andrea Kimi Antonelli-te’n an dawt a; Lewis Hamilton of Ferrari chu pasarihna a ni.
Racing Bulls rookie Isack Hadjar chu pariatna niin, pakuanaah Alex Albon of Williams kan hmu a; point hnuhnung ber rut tura 10-na luahtu chu Haas driver rawlthar Ollie Bearman a ni thung.
An ram tlankawnga a Red Bull debut nghakchhuak Japanese Yuki Tsunoda chuan a chipuite tan hlawh eltiang teh mah se point hmu zo loin Oracle Red Bull Racing car chu 12-naah a thlenpui.