Swap & Save Campaign kalpui dan enpui
UD&PA Department Lunglei hnuaia sikul bungrua inthleng runpui, “Swap & Save Campaign” kalpui mek chu Ningani khan Lunglei district bawrhsap Navneet Mann chuan a hmunah tlawhin hma an lak dan a enpui.
Bawrhsap hi district urban development officer Lalhruaitluangi leh thawktuten lo dawngsawngin, Swap & Save Campaign hi 3R Centre UD&PA building-ah kalpui niin, he campaign chhung hian sikul bungrua —zirlaibu, uniform, school bag, tiffin box leh thil dang hman hlui, la tha si te thawh theih a ni a, a mamawhte tan a thlawnin lak theih a ni bawk. March 21 thlengin he campaign hi kalpui tum a ni.
Bawrhsap hian Chanmari-a Anganwadi Centre pawh tlawhin, Poshan Tracker app kaltlanga hmel finfiahna (Aadhaar face recognition) a harsatna awm dan a enfiah a. PM-Poshan hnuaia naupang leh nuten chaw tha an dawn turte anmahni ngeiin an dawng tih finfiahnan Poshan Tracker app-ah hian an Aadhaar card chhinchhiah sa hmangin nutrition latute hmel online-a finfiah phawt a ngai thin a. Hemi kawngah hian khawl lam harsatna avanga hmel hmuh dik theih loh a awm thin avangin Anganwadi Centre hrang hrangah harsatna an tawk thin. Hei hi chinfel a nih theihnan leh an harsatna a taka hmuhpui turin Anganwadi Centre hi tlawhin, Poshan Tracker an hman dan a enfiah a ni.
Hrangchalkawn Urban Primary Health Centre (UPHC) pawh Navneet Mann hian a tlawh a. Medical officer Dr VL Hrechianga leh thawktuten an lo dawngsawng. Tunhnaia tlangzarh LushAI Healthy Lunglei mobile application kaltlanga damlote inentir tura an inziahluh theih dan leh an hriselna dinhmun leh damdawi chawhna an dawn theihna chu a taka hmang chhinin, tangkai zawka hman a nih theih dan tur, awlsam leh felfai zawka hman theih tura tihchangtlun tulna lai a enfiah a ni.
Swap & Save Campaign kalpui dan enpui
