Australia-a Sydney kawtthler lun lai taka vawi tam tak silai hmeh puah leh mi 20 vel hliam tawrhna thlengah mipa pakhat man a ni a, police chuan firfiaka chetne emaw, mi sual pawl inrawlhna emaw a awm lo nia an ngaih thu an sawi thung.
Police hi Pathianni tlai khan khawpui laili Inner West kawtthlerah mipa pakhatin car leh police a tawngpawng kah avangin koh an ni.
Pisaa thawk pakhat, Joe Azar-a chuan kawngpui lehlama a hna thawhnaah hal mawi nge lunga tukverh darthlalang vawm chhiat ri ni awm tak a hriat thu a sawi a. “Mi thenkhat lirthei hma darthlalang a keh a, bus stop-a darthlalang pawh a keh bawk,” tiin The Sydney Morning Herald chanchinbu a hrilh.
New South Wales Police Acting Superintendent Stephen Parry chuan ‘silai hi vawi 50 atanga 100 inkar vel kah a ni’ tih a sawi.
Police thahnem tak tirh nghal an ni a, kawtthler pawh khar zui a ni a, mipa kum 60 mi man a ni a, a kut atang hian rifle pahnih man tel a ni a. Man tum a nih laia hliam tenau a tawrh avangin damdawi inah hruai a ni a, thubuai siam a la ni lo va.
Mipa pakhatin hliam na deuh hlek a tuar tih police-in an sawi a. Mi dang 19-in darthlalang leh thil dang kehthemin a per fuh avangin hliam tenau an nei hlawm bawk.
New South Wales Police Commissioner Mal Lanyon-a chuan silai hmeh puah chhan hi hriat mai theih a ni lo va; mahse, firfiaka chetna leh mi sual pawl thiltih erawh a nih a rinawm loh thu radio station 2GB hnenah a sawi a. An chhui zui mek zel tih a sawi.
Australia-ah hian inpawng kah hi a thleng tam lo hle a. Automatic leh semi-automatic silai chu kum 1996 khan Port Arthur, Tasmania-a mi pakhatin mi 35 a kah hlum atangin khap a ni.
Sydney-a mi pawng kahah 20 hliam, mi pakhat man
