Syllabus pawn lama lehkhabu
tha chhiar uar turin zirlaite chah
Govt. Aizawl West College chuan Ningani khan an college week an khar.
A kharna hmanpuitu Higher & Technical Education minister Dr Vanlalthlana chuan, zirchiannaa tarlan danin, zirlai piah lamah taksa inzawizawi leh infiamnaa intihsiak chu rilru ti harh a, tumruhna siamtu leh puitlin inzirna tha tak a ni tih a sawi a. An zirlaiah theihtawp chhuah tur an nih rualin, an ngaihtuahna leh khawthlir tihmasawna tihzaunan syllabus pawn lam lehkhabu tha chhiar uar tel turin a chah.
Tuna college zirlaite khawvel hmachhawn tur chu tunhma generation-te nen a inang tawh lo tih sawiin, graduate hnua hna an zawn hunah mahni mihringpuite chauh niloin, hna peng tam takah chuan AI nen an inel a la ngai chho dawn tih a sawi a. Kawng engkimah mahni theuh hma kan sawn a, kan thlen san theih ber dinhmun luah tum turin zirlaite a chah.
College Week intihsiakna hrang hranga tithate hnenah minister hian lawmman a hlan nghal a. Govt. Aizawl West College-ah hian zirlai 700 vel an awm.
Syllabus pawn lama lehkhabu tha chhiar uar turin zirlaite chah
