An zirlai kaihhnawiha Mizoram rawn tlawhtu, Taiwan-a Chung Hsing University atanga lokal Prof. Ted Chang leh zirlai 11 chu AH & Vety minister C Lalsawivunga leh Horticulture minister Prof. Lalnilawma ten August 30 khan an lo kawm.
Kumin kum tira Horticulture minister Prof. Lalnilawma leh Horticulture department official-te bakah OSD to chief minister Jonathan Lalremruata te Taiwan-a an zin tuma an hmalakna leh inremna bawhzuina kalzelah Taiwan-a Chung Hsing University-a Prof. Ted Chang leh a zirlai 11 te hian Prof. Lalnilawma hi a office-ah tlawhin an inkawm a. Taiwan atanga thingpui an rawn ken leh India rama thingpui neih hmangin High Mountain Tea siam dan a takin an entir a ni.
Chung Hsing University hian Mizorama thingpui tharchhuah hi an lo la tawh a, Taiwan thingpui man to, High Mountain Tea an tih chu a siam theih leh theih loh an lo zirchiang a ni.
Horticulture minister hmalakna hian Horticulture department leh Chung Hsing University hian High Mountain Tea siam danah leh thei sawngbawl kawngah hma lak ho an lo rel tawh bawk.
Thenzawla College of Horticulture Central Agricultural University dean Dr Shri Dhar leh a thawhpuite bakah Chung Hsing University nen hian thawhho theih dan kawng zawn an tum a ni.
Taiwan-a university zirlaiten Mizoram thingpuife zirchiang
