Mizoram Public Service Commission buatsaih Mizoram Civil Service (Combined Competitive) Exam 2025-a pakhatna Tanhril tlangval Lalremsiama Darchhun chu February 20 zan khan Tanhril Local Council leh All NGO huaihawtin chawimawi a ni a, bialtu MLA TBC Lalvenchhunga’n a hmanpui.
Bialtu MLA chuan rawngbawlna hmasa ber (primary duty) kalsan a, rawngbawlna dang kohhranah a ni emaw, khawtlangah a ni emaw kan inhman tam tawlh tawlh hian, kan basic duty-in a tuar thin tih a sawi a. Ram rawngbawl hna thawktu sawrkar hnathawkte chu kohhran leh khawtlang mipui pawhin an awl thiam a pawimawh tih a sawi a ni.
Mizoram sawrkar hnathawk zingah service a lo rei tawh chuan, mawhphurhna hlenchhuak turin eng thuneihna nge kan mamawh tih leh, status avanga thawh chhuah lam ai maha pay level hmanga mi tehna tur ngai pawimawh zawk an awm thin a, inelna aiin inerna a tam thin tih TBC Lalvenchhunga hian a sawi a. Lalremsiama pawh chawimawi theih tura tling chauh a la ni a, chawimawi a phu em, tih chu a hnathawh danin a la hril dawn a ni, tiin, “Danglamna kan thlen duh a nih chuan tun hi a hun a ni,” a ti.
Lalremsiama Darchhun hi Local Council leh NGO hrang hrangten lawmpuina thilpek an hlan a, Tanhril Senior Band-in lawmpuina rimawi an tum sak a ni.
Tanhril-in MCS-a pakhatna chawimawi
