Tariff avanga an inkar a that tawk loh boruak a awm mek laiin India leh US sipaite chuan sipai nunchan zirna lian ber neih tumin hma an la mek a, an thawhhona tha sa tihthat belh zel an tum.
Exercise Yudh Abhyas vawi 21-na tur hi September 1 leh 14 inkarah Alaska, US-ah neih tura ruahmanna siam mek nia sawi a ni.
Kumina nunchan zirho tur hi huam zau zawka neih tura tihlen a ni dawn a, Indian Army 400 an tel dawn a, tum khata Indian an tel tam ber tum a ni dawn a. India atanga tel turte hi sipai chi hrang hrang atanga thlan khawm niin India-a indo pawl hlun leh thawk nasa ber pakhat, Madras Regiment-in an hruai ang.
Exercise Yudh Abhyas hi kum 2004 atangin kum tin neih thin niin India leh US-ah nghah chhawk a ni a, UN Chapter VII hnuaia firfiaka chete beihna kawnga hmalak dan tur zirna, muanna a awm theih nana chet lak zirna a ni.
Tactical drill an neih tur zingah firfiakte hlauhawm theihna lo hmachhawn dan, ruahmanna siam dan leh indona tak taka chet chhuah dan te a tel thin.
Tun tuma nunchan zir tur hi Indian sipaiten Operation Sindoor an kalpui hnua a hmasa ber tur niin he beihpui thlaknaa Indian sipaite chet dan hi US sipaite pawhin tha an ti a, an tawnhriat atanga inzira sipai chet laknaa zir ve theih awm ang angte inzirtir ve leh inhrilh chu an tum nia sawi a ni.
US Army hian an hmanraw tha zinga mi, Stryker combat vehicle pawh an thawh chhuahpui dawn nia sawi a ni a, hei lirthei hi India pawhin a lo thlithlai tawh a ni a. Tun tumah hian India hian enchhin nana hmangin a chet dante an thlithlai ang a, nakin zelah an tan pawh hman chi a ni dawn em tih enchhinna atan a tangkai hle thei tura ngaih a ni.
Exercise Yudh Abhyas vawi 20-na kha nikum khan Foreign Training Node, Mahajan Field Firing Ranges, Rajasthan-ah neih niin kuminah sipai tam zawk leh hmanraw tha zawk nena neih leh tur hian ram pahnih sipaite thawhhona thatzia a tilanga ngaih a ni a. Trump-a president a nih hmasak hun lai atanga inkungkaihna siam tawh chu a la nghet hle nia ngaih a ni bawk.
Exercise Yudh Abhyas hi sipaiten chet lak an zirna a nih piah lamah ram hnih sipaite inpawh lehzualna tura ruahman a ni a. Thiam thil, theihna leh thil tih dan an inhrilh tawn bakah nakin zela ram venhimna kawnga a huhova beihpui thlakna zelah hmalak tiawlsamtu atana tih a ni.
Sumdawnna kawngah ram pahnih inkar hi khi mek mah se India-US inkungkaihna leh venhimna kawnga an insuih zawmna chu a nghet hle a, eng emaw thil dangah inmil lohna nei mah se himna kawngah chuan an tangrual hle tih a tilang niin mi thiamte chuan an sawi.
Hetih lai hian US hian India hmelma kumhlun, Pakistan pawh a kawm hnai hret hret zel a, an ram leh khawvel tiralmuang lotu firfiak pawl a thunun danah a fak thu pawh a sawi chhuak.
A hmain Pakistan Army chief Field Marshal Asim Munir-a chuan US hi a tlawh bawk a, Trump-a sorkar chuan inlak hran tuma bei mek, Balochistan Liberation Army (BLA) chu ‘foreign terrorist organisation’-ah a puang zui a ni.
Tariff-a inrem lohna karah India-US sipaiten nunchan zir dawn
