MizoTaxi App-a in register taxi-te chu enchhin (trial basis) nan July ni 10 atanga August ni 10 (thla khat) chhung ni tin tlan phalsak an ni a, taxi tlan loh niin a huam ve lovang. An taxi hnung leh hmaah STA-in MizoTaxi App sticker a pek chu an tar ang. Enchhinna neih chhunga MizoTaxi App-a in register apiangte chu taxi tlan loh niin a huam lo bawk ang a, ni tin an tlan thei ang. MizoTaxi App-a in register lo taxi-te chu intlanchhawk dan tur pangngai angin an tlan chhunzawm ve thung dawn a ni.
Hei hi nimina Superintendent of Police Traffic Aizawl thuchhuahin a tarlan dan a ni.
Thuneituten an sawi danin, MizoTaxi App siam a nih chhan hi mipui hmakhua ngaih vang a ni a, sawrkar-in taxi fare a bituk anga dik taka mipuiin taxi an hman theihna tura duan a ni. Hun kha leh chen kha taxi service-te hian sawrkarin taxi fare a bituk ang hmang duh lovin an duh zat zat taxi fare an bituk a, mipui an rawk a ni ber a. Chu chu thuneitute pawhin an hre vek a, mahse eng mah action an la lo a, tun hun hi kan lo thleng ta a ni.
Taxi service ten uchuak takin taxi fare an la thin tih thuneituten an hria tih a lan chianna chu tuna MizoTaxi App hi a ni. Dik zawka mipuiin taxi fare an pek theihna tura duan a nih chuan, MizoTaxi App lo piang ta hi taxi service-te hian dik lo takin taxi fare an la reng thin tih nemnghehna a ni.
Thuneituten hman vek tur tia MizoTaxi App an siam chu tunah pawh hian taxi service tam zawk chuan thuneitu zawk ang maiin an han zawm duh lo leh pang mai a. MizoTaxi App hmangtu taxi an awm tawh chung pawhin, thuneitute lahin App hmang ve duh lote chu taxi fare dik lo hman an la phalsak chhunzawm ta fo niawm tak a ni a. Tuna ‘enchhinna’ tih vel pawh hi thil tul tehchiam a ni awm lo e. App hmangtu taxi service an awm tawh chuan, App hmang ve duh lote chu eng vanga la service tir talh nge an nih ang, dik lo taka taxi fare lak an la phalsak cheu dawn tihna em ni ang?
Thuneitute pawh hian hetianga ti dim dem lo hian, App hmang duh lo chu service tir lo mai se, sawrkar thu an zawm duh lo a nih chuan an permit-ah tuan se, service duh hnenah taxi permit pe zung zung mai se, taxi service a tlem phah rih a nih pawhin mipuiin city bus an hman phah ve mai ang chu. App hmang leh App hmang lo taxi service a awm tur hi thil dik a ni thei dawn em maw ni le?
Taxi service: App hmang leh hmang lo
