Taylor Swift hla ‘Cruel Summer’ chuan Spotify-ah stream tluklehdingawn a tling ta a, Swift hla he streaming platform-a vawi tluklehdingawn stream kai thei pangana a ni ta.
‘Cruel Summer’ hi 2019-a Swift album ‘Lover’ ami kha niin, he streaming service hian vawi tluklehdingawn stream a kai thu hi niminpiah khan an puang a, X (Twitter an tih thin kha)-ah he thuthar hi puangin, “@taylorswift13 tan kumin nipui zet chu cruel summer tih chi a ni lo. #BillionsClub-ah a hla dang a neih leh tak avangin kan lawmpui e,” an ti.
Swift pawhin a Instagram Story-ah he thuthar hi post-in, a hla thupui chu kai lekin, “Nipui (Summer) pawh vawi tluklehdingawn in a râwng (Crueler) zawk e. Hei vang hian in zavai chungah ka lawm e,” a ti ve bawk.
Spotify-ah hian hla vawi tluklehdingawn stream kai thei hi hla 468 chiah a la awm a, chung zinga hla panga chu Taylor Swift hla a ni a, ‘Midnights’ album atangin a hla hit ‘Anti-Hero’, ‘1989’ album atangin a hla hit ‘Blank Space’ leh ‘Shake It Off’ bakah Fifty Shades Darker soundtrack, Zayn Malik nena an zai dunna ‘I Don’t Wanna Live Forever’ te chu Spotify-ah vawi tluklehdingawn stream an lo kai tawh bawk a ni.
Taylor Swift ‘Cruel Summer’-in Spotify-ah 1B stream a tling ta
