Taylor Swift concert movie ‘Taylor Swift: The Eras Tour’ chu Ningani kalta khan cinema hall-ah an chhuah tan kha a ni a, tun weekend chhung hian North America-ah cinema hall ticket hralhna atangin dollar maktaduai 100 chuang lalut hman turin an chhut tlat mai.
‘Eras Tour’ film hian Zirtawpni-ah cinema hall ticket hralhna atangin US-ah dollar maktaduai 39 a lalut thei a, hei hi a theuneu lo khawp mai. Khawvel huapa film hlawhtling ‘Spider-Man: No Way Home’ leh opening day (Zirtawpni)-ah dollar maktaduai 39.2 a lalut a, ‘Joker’ khan dollar maktaduai 39.4 a lalut bawk. He concert movie hian opening weekend sum lakluhah Joker a khum thei a nih chuan October thlaa film tlangzarh tawh zawng zawngah opening weekend-a sum lalut tam ber record a siam thei dawn a ni.
Weekend (Zirtawpni – Pathianni) a tawp meuh chuan ‘Taylor Swift: The Eras Tour’ hian music concert film tlangzarh tawh zawng zawnga sum lalut hnem ber a ni dawn tih a chiang tawh a, 2011-a Justin Bieber-a concert movie ‘Never Say Never’ record a khum dawn a, he film hian US-ah dollar maktaduai 73 a lalut thei a, he record hi ‘Eras Tour’ film hian a khum dawn tih a chiang tawh a ni.
Eras Tour film hian cinema hall-a an chhuah tan ni, October ni 12 khan advance ticket sales-ah US-ah dollar maktaduai 26 a lalut nghal a, hei hi single-day advance ticket sales record a ni. He film hi US pawnlamah pawh tlangzarh a, opening weekend-ah khawvel huapin dollar maktaduai 150 vel lalut turin an chhut a ni.
Taylor Swift ‘Eras Tour’ film-in $100M chuang lalut dawn
