Taylor Swift leh Post Malone hla hit ‘Fortnight’ chu Billboard Hot 100 chart-ah a No.1 a, he chart-a kar hniha No.1-na a ni ta a, hetihrual hian Swift hla dang pahnih chu top 10-ah an la lang a, Tommy Richman, Shaboozey leh Sabrina Carpenter te pawh top 5-ah an lang. Swift hian kar kalta chart-ah khan record siamin, a album thar The Tortured Poets Department a hla ten chart top 14 thleng a luah vek a nih kha.
Billboard Hot 100 (singles) chart hi kar khat chhunga US-a hla lar dan tehna niin, chart ranking siam nan hian all-genre US streaming (ofificial audio leh official video), radio airplay leh sales data te chu tehna pawimawh a ni.
Taylor Swift ‘Fortnight’ featuring Post Malone hian kar khat chhungin US-ah stream maktaduai 38.2 leh sales 6,000 neiin, radio airplay-ah pawh ngaithlatu maktaduai 33.3 a la nei thei a, hei hi a kar hnih nan chart-ah a No.1 pui leh ta a ni. Hot 100 chart No.1-a Taylor Swift hla hrang hrang lang thei te lan rei zawng belhkhawm chu kar 36 a tling ta a, he chart-a No.1 rei lamah pakuana a ni. He chart No.1-a lang rei ber chu Mariah Carey niin, kar 93 a No.1 tling tawh a, Rihanna (60), The Beatles (59), Drake (56), Boyz II Men (50), Usher (47), Beyonce (46), Michael Jackson (37) te Swift hmaah la awmin, Adele (34) chu top 10-ah a lang ve bawk.
Tommy Richman ‘Million Dollar Baby’ chuan stream maktaduai 38, radio airplay 3,02,000 leh sales 4,000 tling No.2 a ni a, Tommy Richman i Hot 100 chart-a a lan vawi khatna niin, No.2 a kai nghal thei a ni.
Shaboozey, a hming tak Collins Obinna Chibueze, ‘A Bar Song (Tipsy)’-in stream maktaduai 36, radio airplay maktaduai 1.4 leh sales 21,000 neiin, No.27 atangin No.3-a a invawrh a, he chart top 10-a a lan vawi khatna a ni. Saboozey hian Beyonce album ‘Cowboy Carter’-ah khan hla pahnih ‘Spaghettii’ leh ‘Sweet*Honey*Buckiin’-ah te a aw a thawh ve a, heng hla pahnih te hi chart No.31 lh No.61-ah langin, Hot 100 chart a lang thei hla pathum a nei ve ta a ni.
Sabrina Carpenter hla hit ‘Espresso’ pawhin stream maktadiuai 30.8, radio airplay maktaduai 13.9 leh sales 4,000 neiin, No.22 atangin No.4-ah a invawrh a, he chart top 5-a a lan vawi khatna a ni. He hla hi a hmain chart No.7 te pawh a lo kai tawh a ni.
Chart No.2 te pawh lo kai tawh, Benson Boone ‘Beautiful Things’ chu No.15 atangin No.5 a kai thar leh ta a, chart No.1 hlui Teddy Swims ‘Lose Control’ chu No.18 atangin No.6-ah a insawnleh a, Chart No.1 hlui bawk Hozier ‘Too Sweet’ chu No.16 atangin No.7 a kai thar leh ta a, chart No.1 hlui tho Future, Metro Boomin leh Kendrick Lamar ‘Like That’ chu No.17 atangin No.8 a kai thar ve leh ta bawk.
Top 10 khartu hla pahnih chu Taylor Swift hla ve ve niin, ‘I Can Do It With a Broken Heart’ chu No.3 atangin No.9-ah a tawlh a, ‘Down Bad’ chu No.2 atangin No.10-ah a tawlh ta bawk.
Taylor Swift & Post Malone ‘Fortnight’ a la Hot ber
