Taylor Swift-i’n a ti leh ta. Billboard Global 200 chart top 9-ah Taylor Swift hla hlang a lang a, a album The Tortured Poets Department a hlate vek niin, tum khatah Global 200 chart top 10-a hla lang thei ngah ber a ni. Hetihrual hian a hla hit ‘Fortnight’ featuring Post Malone chu No.1-ah a debut bawk.
Billboard Global 200 chart hi kar khat chhunga khawvel huapa hla lar dan tehna niin, chart ranking siam nan hian ram hrang hrang 200 chuang a official-only stream (subscription leh ad-supported audio leh video music services) leh download sales te chu tehna pawimawh a ni.
‘Fortnight’ hi Taylor Swift tan he chart-a a hla No.1 kai thei pangana a ni a, soloist zingah he chart-a No.1 kai thei hla ngah ber a ni a, Post Malone tan he chart No.1-a a lan vawi khatna a ni ve thung.
Tunkar Billboard Global 200 chart top 10-ah hian Taylor Swift hlain top nine a hauh vek a, a album thara hlate vek niin, he chart an siam tan atangin chart top 10-a tum khata hla lang thei ngah ber a la ni a, hetiang hi tum hnih a tawng tawh. 2022 November khan a album ‘Midnights’ a hla pakua chu he chart top 10-ah hian tum khatah a lo lang thawt tawh bawk a ni.
‘Fortnight’ hian ram hrang hrang 200 chuangah kar khat chhungin stream maktaduai 176.8 leh sales 27,000 a nei thei a, hei hi chart-ah a No.1 pui a, Global 200 chart an kalpui atangin kar khata hla stream nasat-ah pariatna a ni pha a, Swift hlaah chuan kar khata stream nasat ber a la ni.
Taylor Swift hian Billboard Global 200 chart top 10-a lang thei hla 33 a nei tling ta a, he chart top 10 a lang thei hla ngahah Drake (35) chiah a pha lo.
He chart top 10-a Taylor Swift hla ni lo lang thei awm chhun chu Artemas ‘I Like the Way You Kiss Me’ niin, No.2 atangin No.10-ah a tawlh a, kar liamta No.1, Hozier ‘Too Sweet’ chu No.13-ah a tawlh ta bawk.
Billboard Global 200 Chart Top 10:
No. 1, Taylor Swift “Fortnight,” feat. Post Malone
No. 2, Taylor Swift “Down Bad”
No. 3, Taylor Swift “The Tortured Poets Department”
No. 4, Taylor Swift “So Long, London”
No. 5, Taylor Swift “I Can Do It With a Broken Heart”
No. 6, Taylor Swift “My Boy Only Breaks His Favorite Toys”
No. 7, Taylor Swift “But Daddy I Love Him”
No. 8, Taylor Swift “Florida!!!,” feat. Florence + The Machine
No. 9, Taylor Swift “Who’s Afraid of Little Old Me?”
No.10, Artemas “I Like the Way You Kiss Me”
Taylor Swift & Post Malone ‘Fortnight’ a lar ber
