Taylor Swift ‘The Fate of Ophelia’ a la Hot ber
Kar kalta Billboard Hot 100 chart-ah a album ‘The Life of a Showgirl’ a hla 12 te chart top 12-a an lan hnuah, tunkar chart-ah pawh Taylor Swift-i’n Hot 100 chart top 10-ah hla pariat a la nei thei, top 14-ah hla 12 a la nei bawk. Chung zingah chuan ‘The Fate of Ophelia’ chu a No.1 leh ta a, kar hnih a No.1 tling ta.
Billboard Hot 100 chart hi kar khat chhunga US-a hla lar dan tehna niin, chart ranking siam nan hian all-genre US streaming (official audio leh official video), radio airplay leh sales data te chu tehna pawimawh a ni.
‘The Fate of Ophelia’ hian kar khat chhungin official stream maktaduai 49.1 leh radio airplay-ah ngaithlatu maktaduai 42.2 a la nei thei a, sales pawh 11,000 a la tling a, hei hi a kar hnih nan a No.1 pui le ta a ni. A tirah chuan ‘The Life of a Showgirl’ album-a hlate hi a malin a hralh chhuak lo a, kar kalta chart-ah pawh khan ‘The Fate of Ophelia’ hian sales tel miah lovin streaming leh radio airplay chauh hmangin a No.1 thei tho kha a ni a, tunah chuan album-a hla a malin a hralh chhuak ve ta a ni.
‘The Fate of Ophelia’ hian a kar khatnaah US stream maktaduai 92.5 a nei tei a, chu chu chart calculation atanga YouTube user-generated content (UGC) an paih hnuah kar khat chhunga hla stream nasat ber a la ni a, a kar hnihnaah stream hi 47%-in tlahniam mah se maktaduai 49.1 a la tling a, Taylor swift hla tlangzarh tawh zinga a zawna kar hnih chhunga stream maktaduai 40 kai thei pahnihna a ni a, September 2017 khan a hla ‘Look What You Made Me Do’ chu a zawnin kar hnih chung stream maktaduai 40 chin a lo kai tawh.
‘The Fate of Ophelia’ hi Swift hla he chart-a No.1 ni thei 13-na a ni a, he chart history-ah No.1 kai thei hla ngahah palina a ni a, a hla hrang hrang he chart-a an No.1 hun chhung belhkhawm chu kar 38 a tling ta a, Michael Jackson lehpelin, chart No.1 nih reiah pakuana a ni ta bawk. He chart-a No.1 ni rei ber chu Mariah Carey niin, kar 97 a No.1 tawh a, Rihanna (60), The Beatles (59), Drake (56), Boyz II Men (50), Usher (47), Beyonce (46), Bruno Mars (39), Taylor Swift (38) leh Michael Jackson (37) ten an dawt. (Beyonce total-ah hian Destiny’s Child anga kar 17 an No.1 chu belh tel a ni lo va, Michael Jackson total-ah pawh Jackson 5 anga kar 10 an No.1 belh tel a ni lo bawk.)
Billboard Hot 100 chart top 10-a Taylor Swift hla ni lo, hla dang lang pahnih te chu chart No.1 hlui ve ve niin, KPop Demon Hunters soundtrack HUNTRIX “Golden” chu No.13 atangin No.3-ah a invawrh thar leh a, Alex Warren ‘Ordinary’ chu No.14 atangin No.4-ah a invawrh thar leh ta bawk.
Billboard Hot 100 Top 10:
1 The Fate Of Ophelia – Taylor Swift
2 Opalite – Taylor Swift
3 Golden – HUNTR/X: EJAE, Audrey Nuna & REI AMI
4 Ordinary – Alex Warren
5 Elizabeth Taylor – Taylor Swift
6 Father Figure – Taylor Swift
7 Wi$h Li$t – Taylor Swift
8 Wood – Taylor Swift
9 The Life Of A Showgirl – Taylor Swift Featuring Sabrina Carpenter
10 Actually Romantic – Taylor Swift
Taylor Swift ‘The Fate of Ophelia’ a la Hot ber
