TB natna laka himna atan
enkawl thuai a tul thu aupui
National TB Elimination Programme National Health Mission buatsaihin NSS Unit Helen Lowry Higher Secondary School nen Aizawlah TB awareness rally neih a ni a. National Health Mission mission director Dr. Eric Zomawia’n a vailiam.
Rally hi Vaivakawn Traffic Point-ah tanin National Health Mission office Dinthar thleng neih a ni a. State TB officer Dr Febiola Kharkongor chuan khuhhawngin, rally hi kum 2025-ah TB umbo a nih theihna tura hmalakna – 100 Days Campaign kalpui mek denchhena buatsaih a ni tih a sawi. Pledge chhiar rualin TB vei lo tura pawimawhte chhiarchhuah a ni.
NHM mission director chuan TB hi kum 2025-ah India ram atanga umbo tum a nih avangin ni 100 chhung TB zawn chhuah beihpui thlak kalpui mek a ni a. Mizoramah chuan Aizawl, Champhai, Serchhip leh Mamit district-ah kalpuiin, mipuiin TB an vei nge vei lo hmuhchhuah sak a, enkawl thuai chu he hmalakna in a tum ber a ni tih a sawi.
“TB hrik chu mi tam takin an pai sa anga ngaih a ni a, natna a thlen mai loh pawhin engtik hunah pawh TB natnaah a insiam thei a ni,” Dr Eric Zomawia hian a ti. TB lanchhuah dan hriatchian a, a rang thei ang bera inendik thuai thin a pawimawh tih a sawi a ni.
TB chu vaihlo zial zu leh zu leh ruihhlo laka fihlim lo bakah chaw tha tlachhamten an vei awlsam bik tih a sawi a. TB-ah chuap TB chauh inkaichhawn theih a ni a, a veiten midang an kaidarh lohnan khuh leh hahchhiauin hmui hup that a pawimawh tih a sawi bawk.
TB awareness rally hi Serchhipah pawh NSS Unit Brilliant Higher Secondary School nen neih a lo ni tawh a. Champhaiah NSS Unit Govt. Gandhi Memorial HSS nen neih a ni tawh a ni.
TB natna laka himna atan enkawl thuai a tul thu aupui
