TB vei enkawl mek 1501 awm
Mizoram-ah TB (Tuberculosis) vek enkawl mek mi 1501 an awm a, nikum chhung khan he natna nei thihpui 136 an awm a ni.
Pradhan Mantri TB Mukt Bharat Abhiyaan programme chu Nilaini khan larsap Gen. Vijay Kumar Singh (Retd) hoin hman a ni a. He huna tarlan danin, Mizoramah TB vei enkawl 1501 awm mekin, heng zinga 117 hian Food Basket chhawmdawlna an dawng a, hei hi 7.8% a ni. Nikshay Mitra 76 an awm a, TB vei zinga 32.5% chu taksa mamawh chaw tha dawng lo nia chhut an ni. State/UT TB score siamah Mizoram-in point 68 hmuin 12-na a ni a, a hlawhtlinna rate hi 79.50% niin, TB vei zinga 5% velin thihpui anga chhut a ni. Kum 2024 khan TB vei 2306 awmin thihpui 136 an awm.
Larsap chuan India-in kumin chhung hian TB awm lohna ram nih a tum a, hei hi khawvel pum target kum 2030 aia kum 5-a hma a ni a, kum chanve kan pelh tawh avangin kumin chhung ngeiin theihtawp takmeuh chhuah a tul tih a sawi. Tunhma zawng aiin TB natna chu hriatchian a ni tawh a, hmanrua leh damdawi awlsam taka a awm tawh avangin India ram atanga TB nuaibo turin ngawrh lehzuala tan lak a tul tih a sawi a ni.
Food Basket hmalakna a thlawp zia lantirnan TB vei mi 10 tan eitur tha pek a tum tih larsap hian a puang a. NGO, kohhran leh he hmalakna thlawptute chu TB veiten eitur hrisel an dawn kim vek theihnan theihtawp chhuah turin a sawm. Mizoram chu India rama TB awm lohna state hmasa bera siam tura tan lakpuiah Mizo mipui a sawm a ni.
Health & Family Welfare minister Lalrinpuii chuan khawtlang inpawh leh punkhawm chang nei tam kan nih avangin TB leh boruak atanga inkaidarh theih hrileng lakah kan fimkhur tlan a tul lehzual tih a sawi a. TB do kawngah sawrkarin theihtawp a chhuah a, damdawi in hrang hrang pawh thuam chak mek zel a ni tih a sawi a ni.
Food Basket Support kaltlanga TB veite eitur tha pek kawnga thawh hlawk Nikshay Mitra pahnih – NEDFi leh Dr Laxmi Narayan hnenah chawimawina hlan an ni a. TB vei mi 4 hnenah Food Basket hlan a nih bakah NEDFi-in FBS kaltlanga TB vei mi 100 an chhawmdawlna tur Rs. 4,90,000 cheque chu TB veite aiawhin larsap hian a dawn sak a ni.
TB vei enkawl mek 1501 awm
