Team huaisen Argentina an chak zel

World Cup 2026 a quarter-final hnuhnung ber chu Pathianni zing khan khelh a ni a. GEHA Field at Arrowhead Stadium a inkhel hmuhnawm takah Argentina chuan harsa takin Switzerland an hneh a, semi-final a lut. Khel tha lo Argentina in team huaisen an nihzia an lantir chhunzawm zel a, minute 120 chhunga Switzerland an hneh hi derthawng tak chunga an chak zawn vawi thumna a ni. Harsa leh derthawng taka hnehna an chang hram zel hian champion nawn leh turin inrintawkna sang zawk a pe ngei ang.
Champion lai Argentina hi last 16 paltlang zo lovin an tla teuh hle a, Egypt in a pet thla teuh hle. Aigupta lakah hun rei tak chhung si hnih an phurh hnuin hun tawp dawn hnaih minute 15 chhung tha chungchuang taka inlanin, an khingpuite an lehthal a. Inlehthalna lian thlentirin quarter-final an inhlangkai. Quarter-final-ah khingpui an vannei chhunzawm a, khingpui nem ber tura ngaih Switzerland an hmachhawn. Harsatna lian tawk lova semi-final lut thei tura ngaih an nih laiin an khel chhe viau a, tam zawk an nih chhawr tangkaiin hnehna an chang leh thei hram chauh a. Chak tawk tawk chungin semi-final an lut. Chapo thei lova tlang hram zel an nih vangin Argentina hi an inthlahdah thei hauh lova, hei hi an chhawr tangkai thungin a rinawm.
Team ngaihven hlawh Argentina hian Colombia hnawtchhuaktu Switzerland lakah bul an tan tha viau a, goal an thun thuai. Inkhel tan atanga minute 10-na lekah Lionel Messi corner chhuih tha tak chu Alexis Mac Allister chuan fuh takin a tauh goal a, hmahruaina goal a thun. Hma takah goal an thun vangin a phur a, La Albiceleste hi inrintawkna sang zawk nen an inlan chhunzawm.
Goal an thun hnuin Argentina game a buai a, a khel chhe zui ta viau thung. Champion lai hi an game a buai a, ball an chan rei theih loh bakah tihsual an ngah a, an game pawh a ho. Si nghak Emiliano Martinez-a’n ball a man a, na deuhin a petchhuaka lehlamin an lo chang a chu zawng chu a ni deuh mai. Lionel Messi pawh an thukru hneh viau a, hmuh tur a awm meuh lo.
Khelh chhe taka chunga him hram zel Argentina an vannei reng seng lova goal an chhuah ta nge nge. Fuh taka an nawr tlang hnuin Dan Ndoye chuan minute 67-naah fuh zetin a pet goal a, Switzerland si phurh a sut. Goal an chhuahdanah Argentina an hawihai hle a, sawi tur reng reng an ni lo.
An hmahruaina an humhim zawh loh bakah an khelh chhiat bawk vangin Argentina dinhmun a derthawng hman hle. Argentina an hnual a, an buai laiin pumraw lian, thahrui ngah leh chau lo zawk Switzerland an phur viau a, an khel tha zui viau bawk. Argentina hnawkchhuakin semi-final an luh a rinawm hman laiin thil pawi tak a thleng a, an player pawimawh Breel Embolo chu a tluk der vangin yellow card hmuh nawn leh a ni a, hnawhchhuah a ni. Embolo hnawhchhuah a ni hian game a thlak danglam hlawk a, Argentina an phur thar a, an khingpuite an nawr betzui nghal chat.
Bet viau mah se thiam takin Switzerland an in veng a, Argentina hi hmun awl an pe duh lo. An khingpuite nawr bet tak chungin La Albiceleste in goal an thun belh thei lova, minute 30 dang khelh belh leh a ngai.
Extra time-ah Argentina an khel tha leh zual a, ngui leh chau taka awm hman Lionel Messi pawh mupui anga siam thara awmin, a a hlauhawm thar leh ta viau. Hun harsa leh khirhah pawh thih thah tak meuha tan khawh thin Argentina in an huaisen leh thawhrim rah an seng a, an hlawhtling ta nge nge. Julian Alvarez chuan Lautaro Martinez hnen atanga ball a dawn chu a khalh rem te te a, box pawn atangin top cornetr-ah pui zetin a pet goal a, minute 112-naah hma an hruai nawn lehna goal a thun. Alvarez goal thun zet hi chu World Cup 2026-a goal ropui bera chhal ngam a ni.
Goal an chhuah vangin Switzerland in an tlarhnung an veng ringawt thei lova, goal thun tuma tan an khawh a ngai. An theihna zawng zawngin an khingpuite an nawr a, ball kang vawrh nasain Argentina an tihlauthawng thei hle. Goal thun tuma an khingpuite an nawr luatah an chesual thung a, goal an chhuah belh. Argentina hian fuh zetin an khingpuite an nawr tlang. Goal ropui thuntu Julian Alvarez chuan uiawm takin a hun tha neih a hlah zet phawt a, ball ber let leh hi Lautaro Martinez chuan awlsam takin a pet goal a, minute 120+1 an an goal thumna thunin, an chakna a nemnghet.
Khel tha tak Switzerland in tlem zawk an nih an tuar viau a, an si phurh an sut thei tawh lo. Kum 1954 hnu lama quarter-final an khelh lehna hmasa berah uiawm takin an tlawm a, World Cup 2026 chu mittui nen an mangtha.
Red Card kha : Switzerland player pawimawh Breel Embolo kha ‘Simulation (Lemchang / tider te hremna) hmanga hnawhchhuah a ni. Paredes lakah hlauhawm taka chein Yellow card a lo hmu tawh a. |ul lo taka a tluk der (dive) leh rikngawt vangin Yellow Card a hmu nawn leh a, hnawhchhuah a ni ta a ni.