Congress leader Rahul Gandhi chuan car ke pali tyre te chu Telanagana mipui ten an ti puncture vek tawh tia sawiin, Bharat Rashtra Samiti (BRS) party te an chak dawn lo va, chutiang chiah chuan Modi sorkar pawh an chak lo zui ang a ti.
Bodhan, Adilabad leh Vemulawada a public rally a neihnaah BRS sorkar chu na taka sawiselin eirukna kalpui nasaah a puh a. Chief Minister K Chandrasekhar Rao chuan ‘pawisa siamna ministry’ tin te chu a chhung leh khatte a chantir vek a ti bawk.
KCR-an Congress a sawisel fo na chungchangah Rahul chuan KCR hian Chief Minister a nihna State hi Congress party din a ni tih hria sela. Chief Minister ni thei tura a school leh university te hi Congress party din a ni tih hre bawk rawh se a ti bawk.
Chandrasekhar Rao leh a chhungte chu eirukna nasa tak kalpuiah puhin, Kaleshwaram project ah telangana State mipuite sum cheng vch nuaikhat ruksak an ni a ti bawk a. Dam pillar chu a khi mek a, chu chu engmah lo mai a la ni zawk a, mipuite sum ruksak chu a pawi ber lai a ni a ti bawk.
Rahul Gandhi chuan KCR chuan Congress tena mi nuai 20 vel hnena ram an pekte pawh computerisation leh ‘Dharani’ portal dinna tur tia chuanlam siamin a laksak a ti bawk a.
KCR leh Modi te chuan inhriatthiamna thuk tak an nei ti bawkin Rahul chuan a lakah case 24 ziah luh a nih laiin KCR an case pakhatmah a nei lo a ti bawk a. KCR umtu ED emaw CBI emaw an awm ve lo. KCR an Delhi-ah Modi-an rorel se a duh a, Modi-an KCR chu Telangana-ah rorel se a duh bawk a. Mahse, he thil hlauhawmzia hi Telangana mipuite chuan an hrechhuak tawh a ni a ti bawk.
Gandhi chuan Telangana mipui te tan guarantee thahnem tak puangin chungte chu cabinet meeting hmasa berah tihhlawhtlin a ni nghal ang a ti bawk a. Guarantee zingah hmeichhiate tan thla tin Rs 2,500 pek te, gas cylinder Rs 500 a lei tir leh free bus travel te pawh a tel a ni.
Hmeichhiate chuan thla tin Rs 5,000 vel an dawng thei a ti a. Sawifiahna a neihah an bank account ah Rs 2,500 an dawng ang a, thla tin gas cylinder leinaah Rs 700 an hum thei ang a, bus chuan manah Rs 2,000 vel hum bawkin thla tin Rs 5,000 vel an nei thei a ni a ti.
Kum upa te, hmeithai leh rualbanlote pension Rythu Bharosa pawh Rs 4,000 a tihsan a ni ang a, chenna in nei lote tan housing subsidy Rs 5 lakh leh zirlai tena an zirna kal zel turah 5 lakh thlenga an hman theihna tur Vidya Bharosa card te pawh a tiam zingah a tel bawk.
Telangana hnuah Modi tyre puncture ang ti
