Tennessee-a ruah leh tui lian vangin mi pathum thi

Tennessee-a ruah leh tui lian vangin mi pathum thi
Tennessee, US-a nasa taka ruah sur leh sabereka khuangkaih vangin mi pathum vel an thi a, mi pakhat chin hriat lohvin an la awm bawk tih tual chhung thuneituten an sawi.
Nilaini tukah khan puitling pahnih leh naupang pakhat chu thing tluin an car a delh avangin Chattanooga bula East Ridge-ah an thi tih Hamilton County Office of Emergency Management & Homeland Security chuan a sawi.
Anmahni pui tura kal mi pakhat chu tui lianin a la bawk niin an sawi a. Rikrum thila che chhuak thinte chuan a zawn hna thawkin hmun himah a inhleuh kai thei em tih engmah an la hre lo.
Sabereka khuangkaih thleng thei hi Nilaini (India-a Ningani zing) thleng khan Knoxville telin Tennessee hmun eng emaw zatah puan a ni.
Chattanooga Airport-ah chuan Thawhlehni khan ruah inches 6.42 a sur a, kum 1879-a an khawpuia ruah sur zat an chhinchhiah atangin ni khata a sur hnem ber a nih thu Morristown-a National Weather Service Office chuan a sawi.
Chhanchhuah hna thawktute chuan Thawhlehni zan atang khan Hamilton County, Tennessee-ah tui lianin in leh lirthei a chima tangte chhanchhuah hna an thawk tan tih tual chhung fire department chuan a sawi.
Hmun pakhatah chuan van-a tang mi paruk chu chhanchhuah an ni a, an van erawh tuiin a la thung tih Chattanooga Fire Department chuan a sawi.
Hamilton County Mayor Weston Wamp chuan tual chhungah emergency a puang bawk.