Mizoram Larsap chuan nimin Republic Day thuchah a sawinaah a sawrkarin hma a lak uarna tur a tarlang a, chung zingah chuan ‘|halaite hmakhua ngaihtuah’ tih a tel a.
Sawrkar apiang hian thalaite hmakhua ngaihtuah tih hi an ngaihpawimawh zingah an lo dah thin tawh a, mahse ngaihpawimawh a hlawh zo tawk lo thin tih chu tuna kan thalaite dinhmun atang hian a lang a tih theih awm e.
‘|halaite hmakhua’ tih awmzia chu, ‘ram hmakhua’ tih nen intluk reng a ni. ‘Kan thalaite dinhmun a that chuan, kan ram dinhmun a tha dawn; kan thalaite dinhmun a chhiat chuan, kan ram dinhmun a chhe dawn’ tihna a ni.
Tuna kan thalaite dinhmun hi kan ram hlimthla a nih dawn chuan, kan hma lam ram dinhmun chu a tha lo viau mai dawn tihna a ni thei awm e. Ruihhlo leh chin thalo hrang hrangin thalai tam tak a run mek a, thalaite an thi tam, chung zingah pawh chuan mipa an tam, kan ti thin a. Mipa leh hmeichhia inbuktawklohna avangin nakin lawkah chuan dinhmun tha lo tak, hnam pawlhdalna nasa tak thleng maithei a nih dante mithiam hrang hrangin an sawi thin.
Mizote hi tawnhriat la nei tam lo kan nih avangin, a tha lo tih a taka kan tawnhriat phawt loh chuan kan harh chhuak mawh khawpin a hriat a. Chumi tifiah tur chuan tuna kan harsatna lian tak lo ni ta HIV/AIDS chungchangah hian a lang chiang hle. Politics lamah pawh, ‘sum sem’ hi a thatlohzia a taka kan tawn hnuah chauh kan harhchhuak, tiin a sawi theih awm e.
Hetiang bawk hian, thalaite hmakhua ngaihtuah tih chu ram hnuk khawih thil a ni, kan sawi kan sawi; mahse, a pawimawhzia kan sawi thiam ang huin a taka kalpui lam hi kan thiam lo leh tlat thin. Tuna sawrkar hi tihtakzeta ‘human resource development’ ngai pawimawha chawinungtu ni hram tawh teh se.
Thalaite hmakhua ngaihtuah
