Lehkhabu leh a chhiarin ngaihhlut a hlawh loh telh
telh tih an sawi fo a, tunlai thalaite hian lehkha chhiar an thatchhia tih pawh titi tlanglawn tia sawi theih a ni. Mahse he thu hnial hi an awm ang.
Mizo Writers Association te’n Vanapa Hall bathlarah Lehkhabu Pho Runpui an buatsaih a, ni tinin a lun viau zel; a rei telh telh a, a lun telh telh a ni mai lo, sum chevel pawh a pung nasa. Zirtawpni phei kha chuan a lun hle.
Lehkhabu Pho Runpui-a kal hi a tam ber chu thalai an ni tia sawi ngam a ni a, sikul naupang pawh an tlem lo. Nu leh pa leh kum upa lam pawh an awm a, mahse han en thuak pawhin a tam ber chu thalai an ni.
Mizo Writers Association leh Mizo Academy of Letters hruaitu hlu, veteran writer B Lalthangliana chuan thalaite’n lehkhabu an ngaihlu a ti a, an ngaihlu a ti mai lo, “An ngaihlu hlein ka hria… An ngaihlu telh telh,” a ti.
Ani hi 1970s vel atanga thuziak lama inhmang tawh a ni a, 80s-ah te, 90s-ah te, 2000 hnu lamah te lehkhabu engemaw zat a ziak tawh. Ama tawn atanga a thlirin, thalaite’n lehkhabu an ngaihlu telh telh tih chu a hmuh dan a ni a, 70s vel aiin tunlai thalaite’n lehkhabu an ngaihlu a ti.
“|halaite hian lehkhabu hi an ngaihlu a, an ngaihlu telh telh tih hi ka hmuh dan a ni a. A mak khawp mai, lehkhabu man to tak tak pawh an lei tlat zel,” a ti a, Lehkhabu Pho Runpui-ah pawh hian thalaite’n lehkhabu chhah leh man to pui pui an lei thu leh lawmawm a tih thu a sawi.
Tunlai writer lar Dr C Lalawmpuia Vanchiau pawhin Lehkhabu Pho Runpui hi lun a ti a, thalai an kal chu lawmawm a tih thu a sawi.
“Publicity lam a tha vak lo a, chuti chung chuan mi an kal tha ka ti a, hei hi thil lawmawm tak a ni,” a ti a, “|halai hi hei an kal a, a tam ber chu thalai an nih hmel a. Lehkhabu ngaisang thalai an tlem lovin ka hria,” a ti bawk.
‘Thalaite’n lekhabu ngaihlu telh telh’
