Kumin January ni 27 atanga February ni 2 chhunga Mohali, Punjab-a khelh zawh tak Yonex-Sunrise Maharaja Agrasen All India Masters Ranking Badminton Tournament 2024-ah Mizoram Police Badminton Club (MPBC) player leh Aizawl Chanmari West veng pa ni bawk Lalthanzuala chuan bronze medal a dawng.
Zuala hian seeded no 4 ni chungin he tournament hi 55+ men’s singles huangah a hmachhawn a; round of 32 lamah Sawinder Singh chu 21-6, 21-16-in a hneh.
Round of 16-ah seeded no 9 Prashant Mukherhjee chu straight set bawk 21-7, 21-19-in a hneh leh. Quarter-final lamah hian Nagaland lam player seeded no 5 ni bawk Achumi Yakhuvi nen an intum a, harsat na nei loin 21-14, 21-11 straight set hnehna bawk a sualchhuak leh.
Semi-final match pakhat zawkah nikum September thla South Korea ram World Masters Badminton Cham-pionship-a 55+ men’s singles category champion Rajeev Sharma a hmachhawn a, a chak zo ta lo a ni.
Nikum January thla khan Udaipur, Rajasthan-a All India Masters Ranking Tournament final-ah Zuala hian 20-22, 19-21-in world champion ni lai Sharma hi a lo hneh tawh lo bawk a, tuntumah pawh insiamtha zo loin straight set bawkin a tlawm leh a, bronze medal a lungawipui mai a ngai leh ta rih a ni.
Zuala chuan, “World champion ni hlimhlawt a ni a, ball kan in thiam hleih deuh a ni. Min tawngtaipui a, min lo tantute zawng zawng chungah lawmthu ka sawi a ni,” a ti.
Mizoram Badminton Association chuan thuchhuah siamin, Mizoram tihmingtha a, India ram pum inelnaa lawmman pathumna dawng phak Lalthanzuala chu a chhuangin a lawmpui tak zet tih an tarlang a, a kal zelna turah duhsakna an hlan nghal bawk.
Thanzuala kutah badminton bronze medal a lut
