August 22, 2026 khan Thenzawlah lehlangin kan kal a. Hmuifâng tlâng kan tlan lai takin ka thinlungah hla phuah tur a lo lang a. August 24, 2026 zing dar 8:30 khan ka ziak ta mawlh mawlh a, ka ziak zo ta mai a. A thlûk chu Pu Rosangliana (Zorock) siamtir tur a ni tih a lo lang nghal a. Pu Zorocka chu ka hrilh a, hla thute ka thawn a. Ani pawh a lo phur êm êm a, hna hmasaah neiin a lo buaipui nghal a, a thlûk mawi taka siamin amah ngeiin thiam takin min sak sak nghal a, mipuite ngaihthlak theih turin October 15, 2026 khan kan tlangzarh ta a ni.
Lalpa hla min pek “|HATTHEIHMIAHLOHNA BAWM” tih hla hi kan ram leh hnam dinhmun, kan nunphung, kan politics leh kan thlarau nun chungchanga ngaihtuahna thuk tak min neihtîrtu tur hla a ni. He hla thuchah laimu ber chu party politics avanga in\hen darhna, mahni hmasialna, tangka sum ngainatna leh |hattheihmiahlohna laka kan ram leh hnam chhanchhuahna tûra hriattîrna leh Pathian Lalram Sawrkar din tûra chona thuchah a ni
Kan ram leh hnam a dam mawlh lo;
Eirukna luipuiin min len mêk e!
Lanu val rual ruihhlo salah an tang,
Chhan chhuahna jubilee dar kan
nghakhlel.
“Kan ram leh hnam a dam mawlh lo”: Hei hian kan ram leh hnam dinhmun chu damlo ang- hnam nunphung, rilru, thlarau leh rorelna lama natna a kawk a. Chuvang chuan rinawmna a tlahniam a, hmangaihna a dai a, dikna leh felna pawh a bo mêk tih puanchhuahna a ni.
“Eirûkna luipuiin min len mêk e!”: Luipui lian takin a hma zawna thil awmte a len bo ang hian eirukna chuan ram leh hnam nunphung \ha te, dikna leh rinawmna te a tihchhiat nasatzia puanchhuahna a ni. Eirukna hi pawisa ruk mai a ni lo. Mipui chanvo dik tak pêk loh, thuneihna hman sual, mahni hlâwk nana mipui rawngbawlna hman leh dik lo taka induhsakna te hi an ni.
“Lanu val rual ruihhlo salah an tang” Kan \halai tam takte dinhmun chhiatzia leh hlauhawmzia hai rual a ni lo. |halai kan hnam hmachhuan turte, ruihhlo salah an tân avangin kan nih tur angin kan din chhuah theih loh thu sawina a ni.
“Chhan chhuahna jubilee dar kan nghakhlel”: Jubilee chu zalênna, chhanchhuahna leh dinhmun thar neihna entîrna a ni. Leviticus 25-ah Jubilee kum chu salte zalênna leh rochan rama kîr lehna hun pawimawh tak a ni. He hlaa Jubilee dar chu kan ram leh hnam natna, eirukna, ruihhlo leh sual sal tânna a\anga chhanchhuahna hun nghâhhlelhna thu puan chhuahna a ni.
Hei leh chen saltanna khur hi,
Sual tin reng bul ngei chu a lo ni e.
Tangka sum ngainatna thang
hlauhawm hi,
Chhungtinte min rum \haihtu a lo ni.
“Hei leh chen saltanna khur hi”: Zofate chu zalênna nei thei lovin, harsatna leh beidawnna party politics hnuaiah hun rei tak kan awm tawh a. Mipuite chu Party politics- eirukna, mahni hmasialna leh sum ngainatnaah sal ang maia tang kan ni tih puan chhuahna a ni .
“Sual tin reng bul ngei chu a lo ni e”: He thu hi a dawt leh tlar, tangka sum ngainatna chungchang nêna chhiar zawm tûr a ni. Bible-in 1 Timothea 6:10-ah sum ngainatna chu sual tin reng bul a nih thu kan hmuh angin Party politics hmanga sum ngainatna a awm thu puan chhuahna a ni.
“Tangka sum ngainatna thang hlauhawm hi”: Thang chu sa man nâna an hman, a chhûnga lût tân chuan chhuah leh harsa tak a ni. Party politics chu Tangka sum ngainatna thang hlauhawm tak nena khaikhinna a ni.
“Chhungtinte min rum \haihtu a lo ni”: Chu sum ngainatna thang Party politics chuan chhungkaw tin hi min chim a -chhungkua – in\henna, rinawmlohna leh mahni hmasialna leh lungngaihna thlenga min hnuk luttu a ni.
Zonunmawi sira hnawltu chu,
Party politics ngei hi a lo ni.
Tlawmngaihna aia mahni hmasialna.
Sem sem dam dam tih reng a
rem mawlh lo,
“Zonunmawi sira hnawltu chu”: Zonunmawi tih hian Zofate nunphung mawi, tlawmngaihna, inhmangaihna, in\anpui tawnna leh lungrualna sawina a ni. Zonunmawi sira hnawltu tunge ni ta? tih zawhna a ni.
“Party politics ngei hi a lo ni”: Hei hian a chhanna chu Party politics hi Zonunmawi hnawltu bul a nih thu sawina a ni. Party politics avângin chhûngkhat, khawtlang leh kohhran pawh a in\hen \hin. He hla thuchah hi politics-a telna zawng zawng demna ni lovin, party politics ruihchilhna in a nghawng \ha lo sawina a ni.
“Tlawmngaihna aia mahni hmasialna”: Tlawmngaihna Zofate rochan hlu chuan mahni aiin mi dangte mamawh a ngai pawimawh a, mahni hlâwkna aiin khawtlang \hatna a dah chungnung. Mahni hmasialna erawh chuan mi dangte chanvo leh an mamawh a hnawl a, mahni hlâwkna a zawng hmasa \hin. Hnam nunah tlawmngaihna a bo chuan inhmangaihna a tlahniam a, lungrualna pawh a bo \hin.
“Sem sem dam dam tih reng a rem mawlh lo”: Kan ram leh hnama party politics-ah chuan sem sem dam dam tih a rem lo– mahni hmasialnain a tuam vel a. Inpumkhatna aiah in\henna, inhmangaihna aiah inhuatna, tlawmngaihna aiah mahni hmasialna a ni.
Lal Isuan hmun reng a chang lo,
Lal leh thuneih inchuhna bawm a ni.
Hmangaih inremna in hmun a chang lo.
A ruh no no chhuakah tihna a ni.
“Lal Isuan hmun reng a chang lo”: He thu hi thlarau lama ngaihtuahna thuk tak min neihtîrtu a ni. Party politics-ah chuan a takin Lal Isuan hmun a chan theih loh thu sawina a ni.
“Lal leh thuneih inchuhna bawm a ni” : He thu hian party politics chu thuneihna inchuhna hmun, politics chu mipuite rawngbawlna atâna hman tûr a nih laiin, mahni inchawimawina leh mahni hlâwkna atâna hman tumna a nih thu sawina a ni.
“Hmangaih inremna in hmun a chang lo”: Hmangaihna leh inremna hi Pathian Lalram ze dik chu a ni. Party politics a thuneihna inchuhna avânga inhuatna a lo awm chuan hmangaihna leh inremna atân hmun a awm lo \hin. Hnam inpumkhatna dik tak chu mi zawng zawng ngaihdân inang vekna ni lovin, ngaihdân inang lo chung pawha inhmangaih leh inzah tawn theihna a ni.
“A ruh no no chhuakah tihna a ni” A ruh no no chhuak tih hian Party politics chu inpawng nekna hmun, a awmnêm leh chaklote tlawm \hinna a nih thu sawina a ni.
Thunawn :
Zoten Party sawrkar kan duh tawh lo,
Pathian Lalram Sawrkar kan din dawn!
|hattheihmiahlohna bawm sirah hnawlin,
Lungrualna Zion lamlian kan sial dawn e.
“Zoten Party sawrkar kan duh tawh lo”: He thu hi Zofate party politics avânga in\henna leh mahni hmasialna kalsan tûra kohna a ni. Party sawrkar tih hian party bil hlâwkna leh party thuneihna humhalh a mipuite chanvo hlamchhiahna sawrkar sawina a ni.
“Pathian Lalram Sawrkar kan din dawn!” Pathian Lalram Sawrkar tih hian party sawrkar ni lo, Pathian lalna – dikna, felna, hmangaihna leh inremna a rorelna sawina a ni. Matthaia 6:10-ah Lal Isuan: “I Lalram lo thleng rawh se.” tia \awng\ai tura zirtir kan ni. Rom 14:17-ah pawh Pathian Lalram chu felna, remna leh Thlarau Thianghlima lâwmna a nih thu kan hmu.
“|hattheihmiahlohna bawm sirah hnawlin” Hei hi hla hming atâna thlan a ni a. |hattheihmiahlohna bawm tih hi a ngialngan taka ngaih chuan \hatna awm thei lo party politics system chhûngah hian thuneih inchuhna, eiruk duhna, tangka sum ngainatna, mahni hmasialna, midangte huatna leh in\henna te a awm vang a ni. “Sirah hnawlin” tih hi mihring hnawlna nilovin kan party politics nunphung hlui leh thil \ha lo zawng zawng chu kalsan tûra sawmna a ni.
“Lungrualna Zion lamlian kan sial dawn e”: Hei hi hla thunawn tâwpna leh beiseina ropui tak chu a ni. Zion chu Bible-ah Pathian miten Pathian awmpuina an channa leh amah nêna inzawma an chenna hmun a ni. He hlaa a Zion lamlian tih hi Pathian duh zâwng lama kan ram leh hnam kalna tûr, lungrualna leh inpumkhatna kawng tur sawina a ni. Lamlian sial tih chu kawng awm sa zawh mai ni lovin, kawng thar siam, buaina leh harsatna tihbo leh hmalam hun \ha zâwk rorelna atana inbuatsaih tura sawmna a ni.
Kan hnam chu party politics leh pâwl hrang hrangah in\hen mah se, lungrualna Zion lamlianah chuan hnam pum puiin kan kal ho thei ang a, hmangaihna, inremna, dikna, felna leh tlawmngaihna kawng kan zawh tawh ang.
He hla hi a thu a \ha hle mai titu mai ni lovin “Thu tak in hria ang a, thu tak chuan bawih ata a ban ang che u” (Johana 8:32) tih kha a takin kan nunah lo thleng mawlh rawh se.
THATTHEIHMIAHLOHNA BAWM- Rev. Dr. Zaichhâwna Hlâwndo
