Thau uchuak billion chuang awm ti

Khawvel mihring billion chuang te chu thau uchuak an ni tiin The Lancet show a zirchianna tihchuah chuan a tarlang a. Thau zingah hian puitling 880 million leh naupang 159 million chuang an awm niin 2022 data atanga zirchian chuan a tarlang bawk.
Thau uchuak tamna ber hi hmeichhia bikah Tonga leh American Samoa te niin mipa lamah chuan American Samoa leh Nauru te niin puitling 70-80% vel chu thau uchuak vek an ni.
International team of scientists te chuan thau buaipui dan chu thlak danglam vat a ngai tiin an sawi a. Thau uchuak chuan natna hrang hrang heart disease, type 2 diabetes leh cancer thenkhatte a thlen thei a ni.
US chu thau mipa tamna lamah 10 na a ni a, hmeichhe lamah chuan 36 na a ni a. India chu hmeichhe thau tlemna lamah 19 na niin mipa lamah chuan 21 na a ni thung a. China chu hmeichhe thau tamna lamah 11 na niin mipa thau tamna lamah 52 na a ni thung.
Senior researcher Prof Majid Ezzati, Imperial College London chuan, “Thliarkar ram tam zawkah hi chuan eitur hrisel leh eitur hrisel lo awm dan a zirin a daqnglam” tiin a sawi a.
“Hmun thenkhatah chuan eitur hrisello te marketing campaign a nasa a, chutihrual chuan eitur hrisel man te chu a sang bawk si a ni” tiin a sawi.
Prof Ezzati chuan global data an zirchianah thau uchuak an tam chak lutuk chu manganna tham a ni tia sawiin ram tam takin obesity crisis an tawk tawh tia sawi bawkin tun hmaa cher tam lutukna hmunah te chuan thau uchuak an buaipui tawh zawk a ti bawk.
He data zirchian hi kum 1990 atanga 2022 inkar chuhng niin hetih chuhng hian naupangah thau chu a let li in an pung a. Puitlingah chuan hmeichhia bikah a let hnih a pungin mipaah chuan a let thumin a pung thung.
Chutihrual chuan puitling an rih tur aia zang chu 50% in a tlahniam a, researchers te chuan ram retheiah cher lutuk chu a la nasa tho an ti bawk.
World Health Organization (WHO) director general Dr Tedros Adhanom Ghebreyesus chuan, “He zirchianna pawimawh tak hian la naupan viau lai atanga thau inven pawimawhna tarlangin kan eitur leh physical activity te kan tihthat a ngai a ni” tiin a sawi.
Sorkar leh community te tan tlan ngaihna thil a ni a, private sector te pawhin mawhphurhna an lak a ngai a, an thil siamchhuah te chu mipui nawlpui te hriselna nena inzawmna nei tlat a ni a ti bawk.