Inthlan kaihhnawiha political party-te nena an thawhhona thuthlung siam chu an ni lamin an duana an barh luih ni loin, party lamin rawtna an thawhkhawm hnua pawm tlan a ni tih Mizoram People Forum chuan an sawi.
MPF Gen. Hqrs. leh Mizoram Journalists’ Association chuan MPF leh political party-te thawhhona thuthlung siam leh a behbawm hrang hrang an sawi ho a. MPF hruaitute chuan MLA inthlan thianghlim leh muanawm taka neih a nih theih nan political party-te nen tum engemawzat an sawiho hnuah thawhhona an ziak a. He thuthlung hi MPF-in a duh anga a duan, political party-te a pawmtir niloin, MPF leh party hruaituten uluk taka sawihoa, an ruahman hnuah hming an ziahhnan a ni tih an sawi. He thawhhona thuthlungah vek hian an thawhhona thu thehdarh hi party huangchhungah a zau thei ang bera puangzar turin party-te chu beisei an ni tih an sawi bawk.
Thawhhona thuthlung an siam thenkhat bawhchhiatna lam hawi tunhnaiah a thleng zauh zauh tih an sawi a. Chu’ng zingah chuan kawngzawh lam chi te, flag war leh t-shirt/ lukhum siam ang chi, inthlan senso tihautak thei lam pawh a tel tih an sawi.
Zawhna chhangin MPF general secretary Rev Lalramliana Pachuau chuan, tunhnaia Aizawla kawngzawh ang chi neih chu, a hma in an sawilawk a, kawngzawh niloin hmun thenkhata lo hmuah leh kawngsira intlar tur anga sawi a nih avangin remtih loh turah an ngai loa, a tak takah erawh sawi leh rin ang a ni loa, heh a hil duh hle tih a sawi. Campaign-na lam rawng kai, tournament siam ang chi chu thawhhona thuthlunga tih loh tur tihah a lang tel chiah lo tih a sawi a ni.
House to house chungchang chu sawi hlawh ber zingah a tel reng tih a sawi a. Tun tumah hian kumin February-ah thawhhona thuthlung an ziakfel a, hman zui nghal tura ngaih a nih laiin, an sawi ho tha leh a, inthlan hun puan hmaa neih a, puan hnua neih tawh loh nise tiin thu an dah leh ta zawk tih a sawi bawk.
MPF tangkaina a awm lo, tia sawi awm thinah MPF general secretary chuan, 2003 a MLA inthlan thirletin, sum hman a sangin vote inlei a nasa a, invaute a awm. Hetiang zel a nih chuan hausa tak tan lo chuan inthlan chuh theih loh emaw buaina liantham zawk thleng zel thei dinhmunah kan ding nia a lan avangin, kohhran leh NGO an inrawnkhawm a, MPF din a ni ta tih a sawi a ni.
4District forum, constituency forum leh local forum te chu house to house campaign kalpui a nih lohna tura mahni huamchhungah thahnemngai taka hma la turin kan ngen a. Political party-te pawhin house to house campaign kalpui tawh loh tur a ni.
4Thawhhona thuthlung no.3(3) a tarlan angin, inthlan puan hnuah political party-ten kawngzawh phal tawh loh a ni a. Tunhnaiah hmun thenkhatah thuthlung bawhchhiaa kawngzawh thawm hriat tur a awm ta nual a, a pawi kan ti hle. Political party-ten kan thuthlung hi zaha kawngzawh huaihawt tawh loh tur a ni.
4Thawhhona thuthlung no. 2(3) a tarlan angin, candidate-te hnena mimal leh pawl hminga thil dil loh tur a ni a, khawtlang huapa candidate-te intiamna neih tir pawh tih loh tur a ni. Hetiang hi tul loa candidate-te sum sentirna a nih avangin ching lo turin mipui kan ngen
4Party-ten thuthlung no. 3(2) angin veng/khaw tinah iptepui banna (station) kan siam hlawm a. Heng iptepui banna atang hian mipui nawlpui bakah zirlai leh damlote tana harsatna thlen thei thawm bengchheng leh ninawm khawp siam loh tur a ni.
4ECI model code of conduct leh thawhhona thuthlung no.2(3) in a phal loh angin mipui hnenah thil chi hrang hrang sem hi tih loh tur a ni a, t.shirt sem pawh ti tawh lo turin candidate-te kan ngen.
4Social media hrang hrangah inthlan chungchanga thu belhchian dawl lo thehdarh leh mimal inbeihna uchuak lutuk ti lo turin mipui kan ngen a. Hetiang a awm a nih chuan thuneitute hnenah hma la tura thlen a ni ang. {Thuthlung no. 3(4)}
4Party tinten manifesto leh candidate-te chanchin an sem duh a nih chuan MPF Local Forum hriatpuinaa sem tur a ni.
4Thuthlung no.2(6) a tarlan angin veng/khaw tinah party flag leh banner tar theih zat bituk a ni a. Tunhnaiah flag tar kan uar thar leh niin a lang a, tar theih zat bituk aia tam tar lo turin kan inngen a ni.
4Thuthlung no.7(2) a sawi angin inthlan puan hnuah political party ten public meeting/ street campaign an buatsaih dawn chuan MPF kaihhruaina hnuaia neih tur a ni a, chutiang ti turte chuan MPF hriattir tur a ni.
4Thawhhona thuthlung bawhchhiatna a awm nia hriat a nih chuan tute pawhin MPF ah report/ complaint thehlut turin kan inngen.
4Thawhhona thuthlung hi political party hrang hrang aiawhte nen tum engemawzat sawiho hnua siam a ni a, party president theuhten an hming an ziahhnan a ni. Heti chunga zah lo taka bawhchhiate chu mipui zah lohnaah kan ngai.