Thenzawl ram, Lamlian dung zaua Dragonfruit huan neitu chhungkaw 50 vel chuan an tharchhuah leisaktu turin inremna ziahpui an nei tawh.
Lamlian dung zaua Dragonfruit chingtu pawl, Thenzawl Dragon Fruits Growers & Marketing Society General Assembly vawi 3-na Inrinnia neih chu chief minister Lalduhoma’n a hmanpui a. He zauah hian sawrkar sum leh huan neitute sum tam tak senral a ni tawh a, dragonfruit tam tham takin an thar mek tih sawiin, a panna kawng tha nei tura enfiah ngai en chu a kal chhan a ni tih a sawi.
Sialsuk dai emaw a remchanna hmun atanga an huan panna kawngpui siam nan cheng vaibelchhe 31.84 dah a ni a, kawng grade tha tak siam turin hma an la dawn tih sawiin, kawng zal tha zawk zawn a tul avangin sum hian black topping nen vek a daih rih lo a nih pawhin, contractor-ten dik taka an hman phawt chuan kawng tha neihna khawp a daih an ring tih a sawi. Tui lakna pawh sawrkarin a la ngaihtuahsak tur thu a hrilh bawk.
A thlai tharte leisaktu tur Local Soda Pvt. Ltd nena thawhhona an siam chu thil lawmawm a ni, tiin, Local Soda hian kuthnathawktute thlai tharchhuah an leisak a, an process a, hma an sawn zel dawn chuan Hand Holding Policy hnuaiah an thawh dun theih a rinawm tih Lalduhoma hian a sawi a ni.
8 Lamlian dung zauah hian kum 2021 atang khan chhungkaw 50-in ram hectare 82.79 a zauah dragon fruit hmun an siam.
8 Sawrkarin MIDH, FOCUS leh tanpuina awm thei dangin unit 129 siamna a pe a, drip irrigation system a pe bawk.
8 Unit 1 hi ban 200 zel a ni a. Sawrkarin a tanpuina leh an mimal hmalakna nen belhkhawmin tunah hian unit 150 an nei tawh a, a vaiin kung 30000 vel neiah an inngai.
8 An dragonfruit a puitlin vek hunah chuan kumtin cheng nuai 300 man vel an thar thei turah an inngai.
8 Dragonfruit thar leisak turin kum thum chhung atan Local Soda Pvt. Ltd nen inremna an ziak a, kumin atangin an tharchhuah ang ang Farm gate-ah kg khat Rs. 150 zelin an leisak dawn a, a seng hna pawh an thawk nghal dawn.