Thenzawla phullem phah dan tur en
Mizoram sawrkarin Thenzawl Lothazawl Football Ground-a phullem phaha cheithat a tum chu Zirtawpni khan Mizoram State Sports Council hotute, contractor DECOR INDIA Guwahati hotute, engineer-te leh Thenzawl Zone Football Association hruaituten a hmunah enhoin, hnathawh dan tur ruahmanna leh thil pawimawh an sawiho.
DECOR INDIA hi Mizoram leh India ram hmun hrang hranga hetiang hna thawk thin, rintlaka sawrkarin a ngaih a ni a, hna hi an tan nghal thuai dawn tih sawi a ni.
TZFA hruaitute chuan a theih chinah uluk takin an en dawn tih an sawi a. Puih an ngaihnaah company hnathawktute hi an puih thin tur thu an hrilh.
Thenzawla phullem phahna tur hian cheng vaibelchhe 11 chuang ruahman a ni a. Phullem phah bakah pavillion sak thar a ni dawn a, gallery tha tak siama hungna tur pawh hnaah hian a tel. Kum khat leh a chanve chhunga zawh hman tur niin, hemi hma pawh hian an zo maithei tih an sawi a ni.
TZFA chuan an ngenna leh hmalakna anga Lothazawl Football Ground siamthatna, phullem phahna tura theihtawp chhuahtu bialtu MLA, chief minister Pu Lalduhoma leh Sports minister Pu Lalnghinglova Hmar chungah lawmthu an sawi tih an sawi a ni.
Thenzawla phullem phah dan tur en
