Ni tin mamawh thil hrang hrang a thleng tha lo a, nghei chu a awm lo a ni mai thei, mahse a hma angin tunlaiin ni tin mamawh thil a tam lo. Thil man a to bawk a, mipui mamawh thil hrang hrang man a to bakah a che nasa.
September thla atangin ni tin mamawh thil lakluh kawngah Mizoramin harsatna a tawk a, vawiin thlengin a la thleng tha lo. Thil thenkhat chu a laluttu agency te’n an phurh thlen rualin a zo nghal deuh zel a, eichawp zuarte thui tak tak an intlar te pawh a ngai thin. Agency te’n hmun hrang hranga dawrkaite hnenah rualkhaia an sem a ngai thin a, duh zat zat lak tur awm lo thil a awm nual.
Thil man to-ah hian tel a langsar mai thei, bawm khat Rs 1200-a an lak thin khan thla hmasa atang tawh khan a to a, Rs 1550-a lak a ngai.
Bawnghnute (amul) tam tawk a awm thei lo rei tawh a, a thlen apiangin dawrkaite tan intlar a ngai tiin a sawi theih ang. Wai Wai a tam tawk thei lo a, buhfai man pawh a pung.
“MRP aia tova hralh ngai a awm nual a, MRP-a hralhin, a zuartu tan a hlawk lo mai ni lovin hlohna tur pawh a awm,” eichawp zuar pakhat chuan a ti.
Alu a to a, Shillong alu, Kg-a Rs 60 te ni thin kha tunlaiin Rs 80 te a ni a, purunsen pawh Kg-a Rs 60 te ni thin kha Rs 90 te a ni. Shillong alu ni lo alu dang pawh a man a pung a, kg-a Rs 50-a an zawrh thin kha Rs 80 man te a ni tawh.
Artui pawh a man a pung; artui man hi a hma pawhin a che nasa a, ni hnih khat lekah pawh a danglam hman thin. Tunlaia a chet dan erawh, nghet takin a man a pung a, bawm khat Rs 1400 man ni thin kha tun hnai thla hnih vel chu Rs 1550-1600 a ni char char, a zuartute’n an ti.
Tun hnaiah a man pung ve hrim hrim, MRP pung ve hrim hrim a awm nual reng reng a, thingpuife, a lian chin chu a MRP-ah pawh Rs 10-in a pung vek a ni awm e. Chocolate te, toothpaste te pawh a MRP a pung a, noodles pawh a lakna a to.
Tel, wai wai, coca cola leh in tur thil thenkhat, lays leh eitur lam thil thenkhat a thleng tha lo a, dawrkaite’n duh zat zat an lak theih loh thil a awm nual.
Thil a vang, thil man a to
