Tunlaiin thil man a che nasa a, thil man pawh a pung. Amaherawhchu, a man hi a’n pung a, thil thenkhat chu a tlahniam leh. A hma angin ni tin mamawh thil man a nghet lo.
Thil hrang hrang zinga a man pung nasa langsar chu artui hi a ni awm e. A hma chuan artui hi bawm (box) khat Rs 1300 velin a zuartute’n an la thin a, tunlai hian Rs 1550 velin an la thin. Artui man a punna hi thla hnih vel chu a ni tawh ang.
September vel atang khan thil man hi a che a, kawng chhia vanga harsatna tawh vanglai phei kha chuan thil man hi a che nasa. Chumi hnuah pawh ni tin mamawh thil man hi a la che reng.
September vel atang tawh khan tel a vang a, a man a pung bawk. Thla khat chuang tel a thlen loh lai pawh a awm. Tun hnaiah tel hi a thleng a, mahse a man a pung.
Tel hi a zuartute’n bawm khat Rs 1580-in an la thin a, tunlai hian Rs 1650-in an la. Tel man to hi mipuiah a langsar vak lo mai thei a, a zuar chhawngte hian MRP aia tlawma an zawrh theih avangin, an lakna a sang a nih pawhin dawr thenkhat chuan a man an pun chuang lo. A man pun leh pun lo an awm nia hriat a ni.
Sumdawngte sawi danin, tel hi thla khat chuang a thleng lo a, agency te’n lak tur an neih loh laiin hnam dang sumdawngte’n Silchar vel atangin an la reng. Heng lai hian a man pawh a pung nasa a, Rs 1850 te’n an la. Agency te’n an neih loh laia hnam dang sumdawngte’n an la lut thei hi mak an tih thu an sawi.
Bawnghnute a vang tawh lo a, a thleng pangngai tawh tih thu dawn a ni. Bawnghnute hi chu a thlen that loh lai pawhin a man a pung chuang lo.
Thil man pung thenkhat chu a siamtute’n a man an pun vang te a ni a, tun hnaiah MRP man pung a awm nual. Noodles pawh a man a pun dawn avangin wholesale-a pe thin thenkhat chuan lak loh mai an duh thu an sawi.
Zokhawthar-ah Myanmar nena inkalpawhna lei an khar avangin khawchhak lam atanga thil lakluh a hma angin a tam lo a, thleng mumal lo pawh a tam. Khawchhak lam atanga lakluh cigarette man a che nasa a, thil dang pawh a man a che nasa.
Thil man a to, a che nasa bawk
