Thing phun 58.72% chauh nung
Kum 2024-a Lunglei-a Green Mizoram Day denchhena thing an phun chu zaa 58.72 chauh a nung tih finfiah a ni a, hei vang hian sawrkar department hrang hrangten an thing phun hi an enkawl zui mek.
Lunglei District Level Committee on Green Mizoram (DLCGM) thuchhuak bawhzuiin Lunglei DIPR Office chuan 2024 Green Mizoram Day-a an thing phun, Hrangchalkawn leh Thaizawl inkar National Highway 54 kawngpui dung ami chu Ningani khan a hmun sam faiin, a nung lote thing tiak thara an thlak bakah a hungna an siamtha a ni.
DLCGM thu chhuak angin EF&CC department chuan kumin June 13 khan nikum GMD-a Hrangchalkawn leh Thualthu inkar NH-54 kawng dunga thing tiak phunte a nun dan leh a dinhmun an zirchiang a. Lungleia department leh pawl hrang hrang 54-in thing tiak 1170 an phun zingah 687 (58.72%) chauh a nung tawh tih leh, a thi leh chhia thlak ngai 483 leh a hungna chhia siamthat ngai 301 a awm tih an hmu chhuak. Thing phun thi leh chhia a tam chhan hi kawng laihna leivung leh chirh tawlh vangte, kawngsir hungna siam hna thawh vang leh thal a rei vangte ni deuh bera hriat a ni.
Thing phun 58.72% chauh nung
