Newcastle United hlauhthawn ruk chu a takin a thleng dik ta a, an midfielder Sandro Tonali chu thla 10 chhungin inkhel thei lo turin hrem a ni.
Italy leh Newcastle midfielder Sandro Tonali hi Italian Serie A-a a khelh laiin Pawisa inthapna (betting) ah a lo inrawlh tih hriatchhuah a ni a, chhhui chian nghal a ni. Sum inthapnaah a inrawlh nia puh a nih vangin Italy tan Euro 2024 khel tur team atangin chhuahtir zui nghal a ni. Tonali puhna hi chhui chian a ni a, pawisa inthapna thenkhatah a inhnamhnawih ve ngei tih a inpuan tak vangin Italian Football Federation (FIGC) chuan thla 10 chhung club leh ram tan inkhel thei lo turin an hrem.
Pawisa inthapnaa inhnamhnawih vangin Tonali hi kum thum chhung hremna tuar thei a ni naa FIGC chuan thla 10 chhung atan a chungah hremna an lekkawh ta zawk. Hrem a nih tak vangin hmasawn chak tak Tonali hi season kal mekah Newcastle United tan a inlan thei tawh dawn lova. Italy in Euro 2024 an khel phak a nih pawhin ram tan a inlan thei dawn lo bawk. Hrem a tawrh chhung hian training a nei thei ang a, inelna pangngai ni loah chuan a inlan phalsak a ni dawn bawk.
Newcastle United pawhin nipui bazar inhawn laia an lak luh Tonali hi hrem tuar thei dinhmunah a ding tih an hre lawk a. A hmun ruak luah lailawk tur atan midfielder lak luh tur an mit mei ve nghal bawk. January thla khian midfielder thar an lak luh ngei a rinawm. Tarlan tawh angin Newcastle United chuan Tonali hi season tan hma mai khan an la lut a, an la chhawr tam hman lo hle. Italy tan vawi 15 khel tawh Tonali hi a vul chho dawn chauh a, ram tan inelna lian hmachhawn a mamawh em em laia hrem a tuar hi atan ngei pawh a pawi thui thei viau tura ngaih a ni.
Thla 10 chhung atan Tonali hrem a ni
