Thla 18 hnuah Los Choneros gang
hruaitu tlan chhuak man
Ecuador-a Los Choneros gang hruaitu, lung in atanga thla 18 dawn kal taa tlan chhuak chu man a ni leh ta tih President Daniel Noboa-a’n a puang.
‘Fito’ tia hriat lar ni bawk, Jose Adolfo Macias-a hi January, 2024 khan Guayaquil lung in atangin a tlan chhuak a, kum 34 chhung ruihhlo tawlh leh mi thah vanga tang tura hrem a ni.
Macias-a hi man leh a nih rualin US-ah thawn luh a ni dawn tih president chuan a sawi a. Hetah hian sorkar laipui hnuaia court-in ruihhlo leh ralthuam tawlh chungchanga thubuai a neih chungthu an ngaihtuah dawn niin Nilaini khan X-ah a tar lang.
Noboa-a hian a hma khan man leh a nih theih nana puitu hnenah $ maktaduai 1 pek a tiam a, police officer leh sipai sang rualin man tumin an bei a ni.
“Beihpui thlaknaa tel kan police leh sipaite ka lawmpuiin ka chhuak a. An tlu zel ang a, ram hi kan nei leh dawn,” tiin X-ah a tar lang.
Macias-a hi venna khauh ber lung ina sawn a nih hma lawkin a tlan chhuak nia sawi a ni a; mahse, thuneitute chuan chiang takin a tlan chhuah dan an sawi lo.
Him taka a tlan chhuah theih avang hian ‘zau taka lungawi lohna lantir, bomb tihpuah, mi ruk bo, prosecutor langsar thah leh live-a tihchhuah laia TV network beihna’ a thleng zui niin U sorkar chuan a sawi a. Buaina chhuak nasa avangin Noboa-a pawhin Ecuador pumah ni 60 chhung emergency a puang.
Ecuadorian president hian Los Choneros telin mi sual pawl 22 chu ‘firfiak pawlah’ a puang zui bawk.
US Department of the Treasury pawhin Gebruary, 2024 khan Macias-a leh Los Choneros hi ruihhlo tawlh leh Ecuador-a tharum thawhna tipunluntua puhin a hrek ve ve bawk.
Ecuador hi hun eng emaw ti lai chuan Latin America-a ram ralmuang ber a ni thin a; mahse, an thenawm, khawvela cocaine tichhuak hnem ber ber pahnih, Peru leh Colombia-a mi sualten ram danga thawn chhuahna khân berah an hman tak avangin buaina an ngah ta hle a ni.
Tual chhunga mi sual pawl indona bakah ram dang, Mexico leh Albania atanga puihna awm thin avangin ram pumah tharum thawhna a punlun ta hle a ni.
Thla 18 hnuah Los Choneros gang hruaitu tlan chhuak man
