LH.Hauheng
Nghilhloh Rûn
“Khuantevikah han tho ila, thlasik, sikpui rim a rawn nam a, hnar lenin han hawi vel ila, thlasik boruak nuam tak rim a tui tan hle…”
Thlasik khaw vawt han vinzia leh van sanzia chu sawiin a siak mawlh lo va. Ni ala tlang sang lo va, ka zing tho ka khup vawt ti chu a sai der der a, pawnlum sinin ka insangmar leh vel a, aw, thlasik tih mai ka nap thin.
Pawltlâk thla a nih tawh hian chuan, kawngpui kamah leh tuikhur kam velah Lailen leh Pittê ten vartianah an mawng an rawn su det det a, hmuh an nuam a ni. Han hawi vel ila, chiang taka hmuh mai theih turin ‘krismas pâr’ ka inbul maiah hmuh tur a lo awm bawk nen; suihlung hi a leng vawng vawng thin lah tak a.
Hán zin chhuak ila, kawngpui kamah japanhlo pâr, tlangsam pâr, builukham pâr leh tlaizawng pâr te hmuh tur a tam hle mai a, mit ina a tlin tawk vel leka thlawhhma huan siam te ina an thlai chin ‘Anthur pâr’ te lamin hmuh an va nuam em. Kan thlira kan thlir leh thin a nih ber hi maw….
Hmun khawi emaw lunlai leh bazar hmunah te chuan, a khat mawi tawkin a pianna lam hla an rawn zaitir lehin, hetiang hla te hian min rawn awi nung leh a.
Kan nghah krismas lâwmna ni kâwl a êng tan ta,
Rinna mit in van lal naupiang kan thlir…
A khat mawi tawkin Siampuii Sailo, Lalsangzuali Sailo (L) leh T. Lalengzaua hla te an play chhawk hi a ni ber a. Aw! hunpui a ni miau a, engkim mai hian masi boruak hi a ti masi bik hi a ni dah roh va. Khawi emaw lai-ah krismas pâr hmuh tur a awm fur mai bawk a, thlirnin a har thin ngawt mai.
Ni e, masi a ni miau a, kristian te hunpui a nih takah chuan, fam ngaih lusún khawhar chhúngte tan tak te hian nia tawrh har zual dawn chu ni. Nikum maia ú-ama an fakpui te, chhungkua-a inhmangaih leh inthlahlel tak maia cheng/leng dún thin te an kim tawh ngai lohna tur leiah hian, tahna hian bu a va khuar hnem ngai em ve aw, tih vawng vawng chang ka va ngah em! Kan tahna mittui tal hian min chhandamtu lunglai fan se la, vân khawpui atang hian min rawn hnem se, tih hi mal tin sawmtu chung Pathian hnena ka tawngtaina a ni fo va.
Hunpui a nih ang ngeiin krismas-ah hian zawng, chhúngtinte kan engkim leh kan theihna sangber theuhin kan inbuatsaih a, kan phak tawk theuhvin masi hi zawng chhungkaw tin te hian kan hmuak a ni ber a, kan hmalam hun kal zel tur kan thlir dan erawh a inchen in a in ang mawlh si lo, a thlir fuh leh fuhlo kan awm bawk a. Chu chu a ni hunpui masi chu…
Lal pian hun pangpâr a vul leh ta,
Thinlai mu hnu lunglen a kai tho ve;
Vân hnuai mi hril Bethlehem tlang chungah,
Rinin thlain mi an thlâwk kai…
He hun puiah hian zawng lunglên, khawharna leh tahnate hian chhúng tinte min vel tapin, kan hmangaih kaltate ngaih a nâ vawng vawng thin. Ral khat, ram hla taka Bethlehem tlàngpui rinna mita han thlir chan te hian, tlaini tla lenkâwl a êng no riai a, lungtileng tawk chauhin boruak thlifim thaw heuh heuh leh chhum lei bawk vak vel cham delte chuan lunghnur takin, saron pâr tlâna chhûngkimte-a kan lendún hun tur min va ngaihzual tir em…
Lung duh an liam ta a,
An sulhnu lei awm harah hian;
Fam ngaih tin kim dawnin,
Tapin tlai ni ka leng, ka riang lua
e-Lalpa.
Vanduai min awmpui la,
I ram thianghlim thleng ni mah se;
Lei mihring chhung hianin, ka ngai
thiam lo,
Ka lal lung hnem tuar har min dawn
pui rawh.
Favang boruak nuam a lo ral a, zing ni chhuak a lo êng sen phut a, lailen leh pitte te an lo tum a — midum pâr, tlaizawng pâr, janpanhlo pâr leh tlangsâm pâr adt., te an lo langa zing takah han tho ila — thlasik, sikpui rim a rawn nam a, hnar lenin han hawi vel ila, thlasik boruak nuam tak rim a tui hle mai a, tlâng tinah mit tlin tawk turin buh a vu tuk mai a, buh seng turin nu leh pate chuan lo lam an kan a, an hlim teh a sin.
Heng hunah te hlei hlei hian, Bethlehem rim te hi a nâ zual bik hian a hriat a, kan hlimpui-in kan tleipui zawk zaw mah a. Aw! thlasik khel lova kan ngah, krismas hun hlimawm herchhuahpuitu—Thlasik Krismas!
[He ‘Thlasik Krismas’ thuziak hi he leia kan pi neih chhún, kan hmangaih kalta, H. Thanchuaii (L) kum 91 mi ni a, October ni 31, 2021 (Pathianni) zing dar 7:30-a van kohna min chhansan ta hriatreng nan lo ni se.]