Thlasik thli turu takin US a nuai avangin kar kalta khan a kaihhnawihah mi 90 dawnin nunna an chan.
Nunna chan zinga 25 te chu Tennessee-ah niin Oregon-ah 16 in nunna an chan bawk a, heng hmun te hi ice storm vang hian state of emergency hnuaiah an la awm mek a ni.
Mi sing tam tak ten thlipui avang hian power an nei lo bawk a. Tunkar kar laihawl thleng hian vur turu takin a la khuh tura ngaih a ni.
Khawchin kaihhnawiha nunna chan US pumah 89 chhinchhiah a nih thu CBS te chuan an sawi a. Tennesse leh Oregon ah nunna chan an tam ber a. Heng bakah hian Illinois, Pennsylvania, Mississippi, Washington, Kentucky, Wisconsin, New York, New Jersey leh hmun dang dangah pawh an awm bawk.
Portland, Oregon-ah chuan kar kalta Nilain khan thli na lutukin power line a chhem tluk avanga a hnuaia vehicle a delhna lamah power la kal tho si vangin mi pathum a man hlum a, nausen erawh a dam chhuak thung.
Seattle-ah pawh mi panga lai chenna nei lo homeless ten nunna an chan niin Associated Press chuan a tarlang bawk a. Kentucky ah car panga insu vangin nunna chan an awm a, chutiangin Illinois ah pawh mi paliin nunna an chan phah bawk.
Mississippi-ah chuan official ten loh theih lohah lo chuan vehicle khalh chhuak lo tura tiin a chhan chu vurin a khuh avangin kawngpui a nal lutuk vang a ni. College leh university te pawhin winter break an pawtsei ringawt bawk a.
Vur thlipui vangin tui thianghlim lam supply a ti buai nasa hle bawk a, Tennesse-ah chuan tui lamah harsatna namen lo awmin khawvawt lutuk in water pipe 4,000 chuang tui luang thei lovin a dang a ni.
Tap water te chu inbual nan leh insuk nan chuan a pawi lo va, mahse in loh tur tiin thuneitute chuan sawiin in tur, ha nawh leh eitur siam nan tui chhuanlum chauh hmang rih turin mipuite chu ngen an ni bawk.
Thlasik thli turu takin United States nuai mek zel
