Thlawhtheihna-a wing walk upa ber
Kum 90 chunglamah chuan nilum aia thut vel mai mai tawh tur emaw kan lo ti ngawt ang e, Harry Heasman-a ngaihdan a ni dawn miah lo a nia. Harry chu Khawvel Indopui Pahnihna-ah khan sipai-ah a lo tang zak zak tawh a, tunah kum 98 mi a ni tawh a, chuti chung chuan thalai tam zawk fê pawhin kan tihngam loh tur a la ti thei tlat.
Harry i 1954s Boeing Stearman thlawhtheihnaah chungah a ding a, a tlak mai loh nan an tawn bet nual a, chu thlawhtheihna chu engine pakhat chauh nei chi, a hmalama vir nei kan tih hi a ni. Tichuan, thlawhtheihna chu a thlawk chhuak ta a, meter 1,000 a sangah te a han thlawk ta mai a nih chu. Harry hi Guinness World Record chuan wing walk thei upa berah a puang ta a ni.
Harry hian jump suit a dum leh a sen inpawlh a ha a, thlawtheihna thlawh lai hian a chungah hian a pen kual ta vel a, minute kua (9) lai hian wing walk hi a nei a, record hi Duxford Airfield, Canbridgeshire-ah Inrinni kaltaa a siam kha a ni.
Harry chuan, “Ka nuna ka thil tawn tawh zawng zawng nuam danglam ber a la ni, theih se chu ka inngaihtuah nawn ngai miah loin ka ti leh duh dawn chiang bal,” a ti.
Harry Heasman hi London khawchhuak niin, a wing walk hi a nupui leh fapa, cancer avanga boral tawh te pualin a hlan a, a record siam pah hian Lennox Children’s Cancer Fund charity atan pound 7,500 a tuak ngah ve nghal bawk a ni.
Harry chuan a wing walk hi nuam a tih thu sawiin, “Ka naupan lai atanga tih ve chhin ka lo chak tawh kha kum 98-ah ka ti thei ta a, Guinness World Record siamtu nih phei hi chu suangtuahna piah lam ram a ni tawh. Tunhma zawng aiin a let 100 chuangin ka tha ta sawtin ka hria,” a ti.
Thlawhtheihna-a wing walk upa ber
