Thuampui leh Falkland Veng inkar kawngpui sira thei zuartute chu Aizawl Municipal Corporation chuan vending zone a nih loh avangin chhuak turin a ti a. 2024 August 3-a la awm luite chungah dan angin hma an la dawn tih an sawi.
AMC hian heng inzuarte hi Zirtawpni khan police nen nawrchhuah an tum a. Nawrchhuak nghal loin Aizawl deputy mayor R Thanglura kaihhruaiin Thuampui Local Council nen inbiak zui a ni. Deputy mayor hian AMC-in thuthlukna a siam tawh angin an kal dawn tih sawiin, dan phal lohna hmuna inzuarte chu inkhar turin a hriattir nawn. Kawngsira inzuarten dan lo anga building chhawng an sakte pawh thiat tura hriattir an ni tih a sawi.
The Street Vendors (Protection of Livelihood and Regulation of Street Vending) Act 2017 hnuaiah dan anga vendor-te an kal theihna turin AMC chuan hma a la dawn tih a sawi bawk.
Heng lai hmuna inzuarte chuan AMC hian kum 2020 khan dawr hawn phalna a pe a, vendor license pawh kum 2021 khan a pe niin an sawi ve thung a. Tunah hian mi 30 velin dawr hi hawngin, Thuampui Local Council hnenah an thut man hi thla tlin mi pakhatin Rs.500 an pe tih an sawi.
Thuampui leh Falkland inkara inzuarte AMC-in insawn turin ti
