Nimin khan social media lamah thuchhuah pahnih theh darh a ni a. Thuchhuahtu pakhat chu ‘Mizoram Commercial Vehicle Union’ (MCVU)’ a ni a; pakhat zawk chu ‘All Mizoram Petroleum Dealers Association (AMPEDA) a ni.
Thuchhuah pahnihte hi an pawl letterhead-a chhut kai ve ve a ni a. MCVU letterhead-ah hian hruaitu president leh secretary te hming leh contact nambar bakah, letter no. leh date a awm thlap a. Thuchhuah nemnghettu atan general secretary-in hming a ziah hnan thlap bawk a.
AMPEDA thuchhuah-ah hian hruaitute hming leh letter no. bakah date a chuang lova; a tawpah ‘issued by’ tih a awm a, pawl hminmg tarlan a ni a.
MCVU thuchhuah hi October ni 13, 2024, Pathiannia tihchhuah a ni a. Thuchhuahah chuan – tunlaia Mizorama tha taka Oil Tanker an lo luh laiin mipuiin oil lak tur an tlachham reng si chu a chhan an chhui chian hnuah, “Oil Pump thenkhatin zanlaiah man man zawka hralh turin barrel tam tak an thawn chhuak thin tih hriat a ni” tiin tarlan a ni a. Hei hi supply minister pawhin a ngaih pawimawh thu tarlan a ni a. Hei bakah hian, zanlaia mipui chanai hralh ru thin Oil dealer-te hi zanlaiah surprise check neih thin tha an tih thu tarlan a ni bawk.
AMPEDA thuchhuah nia ngaih hian, ‘contractor leh bulk consumers- petrol pump awm ve lohna khuate tiamin, mipui nawlpui mamawh hun laia inrawlh buai lo a, zan lam mipui thawh tawh hnu changin mipui tibuai lo zawnga Oil pek thin’ a nih thu a tarlang a. Hei bakah hian, ‘a hlawma bura pek thin, rate dik taka kan pek thinte hi Black a ni lo, tiin tarlan a nih bakah, ‘pawl thenkhatin social media-a thudik famkim tawk lo an vawrh darh thin hi tha kan ti lo’ tiin thuchhuah tawpah tarlan a ni bawk.
AMPEDA thuchhuah hi a mawlmang hle a, MCVU-in ‘authentication’ a neih laiin, AMPEDA thuchhuah hi chuan thuchhuah hi an pawl thuchhuah, a tak tak ngei a ni tih lantirna ‘authentication’ a nei ve lo. Tlanchhe chunga thiltih a ang hle a ni.
Filling Sation-te hian mipui rawngbawltu an nihna hi an vawn tlat a pawimawh hle a. MCVU thuchhuahin ‘man man zawka hralh turin barrel tam tak an thawnchhuak thin…’ tih an sawi thei a, hetiang hi tun chinah chuan thleng tawh lo se a duhawm hle a ni.
Thuchhuah pahnih
