Parliament inkhawm kal meka sawrkar rintawk lohna motion putluh thlawp lo zawnga vote thlak tum angin Mizorama eptu party thenkhat ten MNF an puh tih MNF Thalai chuan sawiin, Manipur buaina avangin Mizoram MP-ten sawrkar rintawk lohna hi an thlawp dawn tih an sawi.
MNF Thalai thuchhuak chuan, sawrkar laipuiin Manipur tualchhung buaina a chinfel theih loh avanga eptu party tangrualten Lok Sabha Session-ah ‘No Confidence Motion’ an putluha debate neih mekah hian Mizorama eptu party thenkhatin mipui rilru hruaikawi theih beiseiin thudiklo an vawrhdarh tih a sawi a. Thudiklo hmanga mipui bum hreh lo political party kan la awm chu Mizo kan nihna ang pawhin zahthlak a tih thu a sawi.
‘Sawrkar rintawk lohna lut hi August 8-10 chhung Parliament House-ah sawi ho tur a ni a, No Trust Motion debate hi neih tan chauh niin, Prime minister pawhin motion reply a la neih loh bakah vote lakna a la awm lo a. Hetiang a nih laia Congress leh ZPM party ten mipui rilru hruaikawi tum a, MNF MP-ten BJP an thlawp, tia thudiklo an thehdarh hi tenawm kan ti hle a ni,’ tiin, MNF-in kan ram leh hnam, kan sakhua himna a ngaihpawimawh ber avangin sawrkar rintawk lohna eptu party-ten an putluh hi a thlawp dawn tih a sawi.
‘Pu Zoramthanga kaihhruai MNF hian kan ram leh hnam, kan sakhaw tana pawi thei turah chuan NDA emaw BJP emaw pawh ni se, a do ngam hle tih Zoram mipuiin an hriat kan duh a ni,’ MNF Thalai chuan an ti.
Thudik lo hmanga mipui rilru hruaikawi tumah eptute puh
